Vizita Prezidente Republika ba Distritu Liquiça ho Bobonaro

by Media Team Posted on

MORIS DIAK

Dala idatan no bebeik, iha vizita sira ba komunidade iha Suco no Aldeia remotas sira, S.E. Prezidente da Republika, Taur Matan Ruak, enkoraza, fo kbi’it no haklaken, atu komunidade sira iha area sira ne’e, labele lakon esperansa, katak loron ida, sira sei hetan benefisiu husi Timor nia ukun rasik an, ba sira nia moris.

Iha semana ida nia laran (21-26/04/14), husi Distritu Liquica to’o Distritu Bobonaro, husi Suco ba Aldeia ka husi Aldeia ida ba Suco ida, liafuan “fiar an”, sai hanesan liafuan kmanek no importante ida, ne’ebe Xefe Estadu hakarak kuda no habelar ba Timor Oan hotu, liuliu, ba sira ne’ebe do’ok husi Sentru Sidade.

“S.E. Sr. Prezidente, ami nia estrada aat, ami nia eskola kadeira laiha, meza laiha, ami presiza bee mos, ami la iha Postu Saude, tansa ami eletrisidade laiha?” keisa no pergunta sira ne’e domina iha dialogu, iha fatifatin, ne’ebe S.E. Prezidente da Republika halo ho komunidade sira.

Karik reklamasaun husi komunidade sira ne’e, ba Xefe Estadu la’os buat foun ida. Desde husik nia kargu hanesan Xefe Estadu Major Jeneral F-FDTL, S.E. Taur Matan Ruak, hala’o ona vizita liu 300 resin, ba komunidade sira iha area remotas. Iha fatin sira ne’e, komunidade sira sempre halerik bebeik ba buat sira hanesan temi iha leten. Tan ne’e, Xefe Estadu, hanoin atu kontinua hamoris esperansa no fo forsa ba populasaun, atu hein prosesu dezenvolvementu hakbesik ba sira nia Distritu to’o sira nia Aldeia.

Ema sei lahaluha imi. Nasaun tomak sei lahaluha imi iha ne’e, mesmu sira ne’ebe iha foho tutun ne’eba. Lahaluha. Tamba saida? Husi ida mak ba rua. Husi rua ba tolu. Tolu to’o juta, to’o rihun. Ne’e penduduk (populasaun) Timor. Hotu-hotu iha ne’ebe deit, iha foho lolon, iha rai klean, ailaran, sidade, hotu-hotu, timoroan. Familia ida de’it. Tidak mungkin (imposivel) ita iha uma laran ida, balu han haluha tiha balu. Ita nia asu de’it mos ita fohan, apalagi (sa tan) ita nia familia”, dehan Xefe Estadu, iha Aldeia Leolima, Balibo, (23/04).

Maibe iha enkontru ho Komunidade sira mos, Xefe Estadu kontinua husu atu sidadaun hotu, labele hein de’it saida mak estadu atu halo ba sira, maibe saida mak sira rasik bele halo ba sira nia an desde Suco to’o Distritu no Nasional. S.E. Prezidente da Republika, hakarak hafanun sidadaun sira nia konsensia, katak “Moris Diak”, ne’ebe sai hanesan Nasaun ne’e nia mehi, labele pertense no depende de’it ba ema ka ba Instituisaun Estadu nian ida. Mehi atu hetan “Moris Diak”, ne’e tenki sai hanesan responsabilidade ba sidadaun hotu Timor nian. Katak, se sidadaun hotu-hotu hakarak Nasaun ne’e ba oin, ida-idak, tenki iha konsiensia rasik atu hahu hadi’a nia moris, husi nia an rasik, nia familia, hafoin da’et ba Aldeia to’o nivel Nasional.

“Iha fatifatin Prezidenti husu, imi nia tugas(servisu) seidauk hotu. Hau nian seidauk hotu. Ita nian seidauk hotu. Ita tenki bersatu (hamutuk)servisu mak bele. Ulun fatuk tenki Kreatif (kreativu). Kreatif katak fera-ulun, buka solusaun ba problema”, dehan Xefe Estadu, iha nia vizita iha Suco Hataz (23/04), Sub-distritu Atabae, distritu Bobonaro.

Xefe Estadu fiar, katak atu kleur ka lais, loron ida, dezenvolvimentu iha area oioin, sei tama to’o Timor laran tomak. Presiza tempu, atu mehi ba “Moris diak”, sai hanesan realidade ida. Hanesan mos luta ba ukun’an, mehi atu hare Timor hanesan Nasaun ida dezenvolvidu mos, tenki liu husi etapa oioin. Husi jerasaun ida ba jerasaun seluk, hotu-hotu presiza servisu hamutuk, hodi hatutan Timor nia mehi, hetan “Moris Diak”.