APRESIA ATAURO NIA FURAK, XOKADU HO POPULASAUN NIA MORIS

by Media Team Posted on

APRESIA ATAURO NIA FURAK, XOKADU HO POPULASAUN NIA MORIS

Prezidente Repúblika Taur Matan Ruak ho Primeira Dama Isabel Ferreira, hala’o vizita semana ida, la’o-ain tama-sai Suku no Aldeia sira iha Illa Atauro hodi haree besik liután komunidade sira-nia moris iha sub-distrítu refere, aumezmu tempu halo diálogu komunitária ho populasaun sira.

Prezidente Taur Matan Ruak hato’o ninia apresiasaun aas ba Illa Atauro ne’ebé nakonu ho Paijajen furak, hafutar ho tasi ibun ne’ebé mutin, no mós ba Atauro nia emar ne’ebé laran di’ak no haraik-an hodi simu Xefe Estadu ho komitiva iha sira-nia knua laran.

Xefe Estadu sente admiradu no impresionadu tebes ho Atauro nia furak wainhira hakat ba iha aldeia Akrema, suku Bikeli nian.

Ho laran-kmanek Prezidente Taur Matan Ruak hatete katak Akrema poténsia tebes ba turízmu paijajen no kultura nian.

Hanesan ho Xefe Estadu, populasaun iha Suku Akrema mós sente katak paijajen furak iha fatin refere bele dada no lori turista sira mai vizita, espera katak aban-bairua sira-nia aldeia bele sai fatin turístika.

Iha diálogu Komunitáriu ho Xefe Estadu, komunidade Akrema husu atu Estadu tau-matan hadi’a estrada atu bele liga Aldeia sira iha Suku ne’e, atu nune’e, bele fasilita turista doméstika no rai-li’ur mai pasa férias iha fatin turístika hirak ne’e.

Maske ohin loron laiha estrada hodi fasilita meius transportasaun sira, maibé tuir komunidade sira katak, iha tempu Indonézia eziste dalan ba meius transportasaun atu asesu ba aldeia sira iha suku refere.

Husik hela Aldeia Akrema, Prezidente Taur Matan Ruak ho Primeira Dama no komitiva kontinua hakat ba Aldeia Fatu’u, Iliana, Arlo no Adara.

Iha Aldeia hirak ne’e, admirasaun no apresiasaun ne’ebé mosu wainhira haree beleza hosi natureza Akrema nian nakfilak ba tristeza boot ida. Xefe Estadu sente xokadu, hakfodak no triste ho kondisaun moris komunidade nian, ne’ebé tinan barak ona mak konsumu de’it udan-been tanba laiha kanalizasaun bee-moos.

Iha Aldeia balun maske eziste sistema kanalizasaun, maibé bee laiha, halo komunidade sira hemu de’it bee meer husi posu.

Komunidade sira iha Aldeia Fatu’u, ho hakraik-aan aprezenta sira-nia situasaun ba Xefe Estadu, husu tulun atu fo solusaun ba susar ne’ebé sira hasoru iha sira-nia moris loro-loron.

“Ami husu ba señor prezidente halo favór tau netik iha sua exelénsia nia fuan, ami-nia sofrimentu no problema iha ami-nia Aldeia ne’e, ami konsumu de’it udan-been no bee posu ne’ebé meer, ami-nia oan sira barak mak mate tanba diarreia”, Xefe AldeiaFatu’u informa baPrezidente Repúblika.

Ho mata-ween suli, Xefe Aldeia ne’e halerik ba Xefe Estadu, husu atu ajuda tanke bee nian no zinku atu sira bele prezerva udan-been, “tanba zinku sira ne’e ferujen hotu hodi udan-been mai kahur ho zinku ferujen sira mak ami hemu de’it”.

Hatán ba pedidu ne’e, Xefe Estadu hatete, “Ha’u xokadu loos rona imi-nia problema sira ne’e i imi-nia problema sira ne’e iha balu ke ami ajuda, ami bele. No balu ke ami labele, ha’u sei transmite ba governu hodi buka solusaun”.

Kondisaun moris ne’ebé susar, halo komunidade sira liman-kmaan ba malu. Prezidente Taur Matan Ruak apresia tebes ho komunidade sira-nia dixiplina serbisu hamutuk no serbisu organizadu, ne’ebé tuir Xefe Estadu katak, ida ne’e bele sai referénsia ba fatin sira seluk iha territóriu laran.

Iha vizita la’o-ain ba Aldeia hirak ne’e, komunidade sira sente kontente no orgullu tanba foin ba dahuluk sira haree na’i-ulun boot nasaun nian la’o-ain ba to’o iha sira-nia hela fatin.

Komunidade sira sente hanesan milagre no domin aman nasaun nian ba ninia povu, maske dook no estrada laiha, maibé Xefe Estadu bele hakmaan an ba vizita sira.

Populasaun iha Aldeia Akrema iha mehi boot ida atu sira-nia aldeia bele nakfilak ba fatin turístika. Nune’e mós, komunidade husi aldeia sira seluk iha sira nia mehi rasik, hanesan iha Aldeia Fatu’u, hein atu sira sei la hemu tan bee meer hosi posu, sira-nia oan sei la mate tan diarreia, tanba konsekuénsia hemu bee ne’ebé kahur ho zinku nia ferruzen.

Antes husik Atauro hodi fila hikas mai kapitàl Dili, Xefe Estadu oferese apoiu balu hanezan zìnku ba eskola primària iha aldeia Arlo suku Bikeli nian, no zinku balu ba komunidade aldeia Fatu’u.