S.E. PREZIDENTE REPÚBLIKA SIMU KRDENSIAL EMBAIXADORA FOUN EUA

by Media Team Posted on

Dili, 16 Janeiru 2015 – S.E. Prezidente Repúblika Taur Matan Ruak, simu karta kredensial hosi embaixadora foun Estadus Unidus Amerika nian Sra. Karen Stanton, iha Sesta feira ne’e iha Palasiu Prezidente Nicolau Lobato.

Hafoin remata ho aprezentasaun karta kredensial, seremoniu kontinua kedan ho enkontru bilateral hodi ko’alia kona-ba kooperasaun bilateral entre país rua nian.

Iha ninia intervensaun antes intrega karta kredensial, Embaixadora Karen aproveita okaziaun ne’ebé nia hetan hodi hato’o nia deskursu badak ida hodi dehan katak, oportunidade nee hanesan prevelejiu diak tebes ba nian atu reprezenta Estadus Unidus Amerika nu’udar Embaixadora mai Timor-Leste.

“Ha’u buka serbisu hamutuk ho ita boot, Governu no Povu Timor-Leste hodi mantein no profunda liútan relasaun ne’ebé forte” dehan Embaixadora Karen.

Hola parte iha serimonia intrega kredensial ne’e marka mós prezensa, Vice Ministru Negosiu Estranjeirus Sr. Costancio Pinto, Chefe Casa Sivil, Sr. Fidelis Leite Magalhães no assesores Prezidente Repúblika nian.