S.E. PREZIDENTE REPÚBLIKA HALA’O ENKONTRU SEMANAL HO PRIMEIRU MINISTRU

by Media Team Posted on

Dili, 21 Janeiru 201 5 – S.E. Prezidente Repúblika, Taur Matan Ruak, hala’o enkontru semanal ho Primeiru Ministru, Xanana Gusmão, hodi diskuti kona-ba situasaun seguransa iha país laran, no entrega poder administrasaun ba Zona Exklusivu Ekonomia Merkadu Sosial, ZEEMS, ne’ebé sei akonktese iha fulan ne’e nia laran iha Enklave Oecusse, iha Kuarta feira ne’e iha Palasiu Prezidensial Nicolau Lobato.

Hafoin remata sorumutu semanal ne’e, Primeiru Ministru, Xanana Gusmão, klarífika liútan ba imprensa sira hodi dehan, “Ha’u mai ko’alia ho Sr. Prezidente ami koa’lia liliu ba situasaun estabilidade no mós ami-nia programa ba Oecusse. Ha’u mós informa ba Prezidente tanba saida maka ha’u ba Laga. Tanba iha Kinta lokraik semana kotuk, ha’u simu informasaun katak Sr. Mauk ho nia grupu hapara kareta Polísia ninian. Pois prende tiha Polísia, hasai Polísia nia pistola, i sunu tan polísia nia kareta, ne’e krime kontra estadu tanba ne’e mak ha’u ba. Pois ha’u haree Polisia kanek sira lori tiha ba óspital ha’u fila, ha’u fila tanba idea klara ona fó fali kna’ar ba komandante sira”.

Xefe Governu ne’e hein katak, Mauk Moruk di’ak liu rende atu bele responsabiliza ba nia aktu.

Hafoin ida nee, Xefe Governu mós informa kona-ba akontesementu esplosaun granada iha rezidensia embaiaxa Estadus Unidus nian. Primeiru Ministru mós klarifika katak, kazu ne’e hanesan diversaun atu fahe atensaun governu nian, maibé hanesan Ministru Defeza no Seguransa nia parte halo ona koordenasaun di’ak atu perevene karik bele mosu tan iha fatin seluk ruma.

Wainhira hatan kona-ba Zona Exklusivu Ekonomia Merkadu Sosial, ZEEMS, Primeiru Ministru Xanana Gusmão dehan katak, Xefe Estadu sente satisfeitu no dehan katak katak ne’e hanesan susesu ba governu atu intrega kbiit no poder ba Governu rejional Oecusse.