S.E. PR, TAUR MATAN RUAK: “SIDADAUN IHA PAPÉL IMPORTANTE BA DEZENVOLVIMENTU TIMOR-LESTE NIAN”

by Media Team Posted on

Munisípiu Lautem, 26 Janeiru 2015 – S.E. Prezidente Repúblika, Taur Matan Ruak, deklara katak, “sidadaun iha papél importante ba prosesu dezenvolvimentu nasionál Timor-Leste nian”. Xefe Estadu hato’o lia menon ne’e iha nia primeiru diálogu komunitáriu ho komunidade suku Fuiloro, Postu Administrativa Lospalos, Munisípiu Lautem, iha segunda-feira semana ne’e.

Ba komunidade Fuiluro Xefe Estadu esplika:

Ha’u kontente mai vizita imi iha Lospalos, liuliu iha Fuiluro. Ha’u-nia primeira vizita ba tinan ida-ne’e maka mai iha Lospalos. Iha fulan Maiu tinan ida-ne’e, ha’u kompleta ha’u-nia mandatu tinan tolu. Ha’u vizita ona suku besik 300 iha Timór laran tomak, i ha’u-nia kompromisu maka kuandu ha’u-nia mandatu hotu, ha’u hakarak vizita suku 442 iha Timor laran tomak ona.

Xefe Estadu hatete liután:

“Primeiru, ha’u aproveita oportunidade para agradese imi, hanesan mós halo iha fatin-fatin, i agora aproveita agradese ba Fuiluro-oan sira ba buat ne’ebé imi halo para Timor-Leste ohin sai nasaun ida livre no independente.”

Entretantu durante sesaun husu no hatán, komunidade sira levanta kestaun kona-ba veteranus inventa dadus partisipasaun iha funu, preokupasaun ba lafaek tata komunidade sira, atuasaun membru instituisaun estadu balun ne’ebé ladi’ak ba komunidade, inklui mós asuntu importante seluk hirak ne’ebé sai preokupasaun ba komunidade sira iha Fuiluru.

Hatán ba komunidade nia preokupasaun hirak-ne’e, Xefe Estadu esplika katak, problema veteranus importante tebes no susar atu rezolve iha tempu badak laran kedan. Nune’e, Xefe Estadu dehan katak, kuaze iha Timór laran tomak veteranu sira levanta kestaun hanesan. Tanba ne’e, Xefe Estadu husu ba veteranu sira atu koopera hamutuk atu oinsá bele rezolve problema ne’ebé refere.

Kona-ba komunidade ida nia keixa ba atuasaun irregulár husi membru instituisaun estadu hirak balun, Xefe Estadu apela ba munisípiu Lautem nian atu buka rezolve tiha problema ne’ebé refere atu labele sai boot liután, no Xefe Estadu lakohi rona tan problema hanesan iha nia vizita tuirmai iha Fuiluru

“Buat ne’e liu ona, ne’ebé, ba oin buka rezolve. Ha’u hakarak Sr. Komandante ho amu Administradór no amu Liurai sira oinsá imi buka rezolve i aban-bainrua ha’u mai fali, ha’u lakohi rona tan. Ha’u hakarak imi hotu iha ne’e halo nusa maka Lospalos hakmatek, halo nusa mak ita-nia inan-aman tuur hakmatek. Imi ida-idak iha tanggung jawaba ba imi-nia nasaun, Lospalos ne’e imi nian. Lospalos só bele ba oin se imi fiar no rona malu.”

Ba problema lafaek, Xefe Estadu hatete katak, lafaek mós problema boot, tanba tinatinan sempre hakanek no oho membru komunidade. Tanba ne’e, presiza duni tau hamutuk iha fatin ida atu labele hakanek ka oho tan membru komunidade sira ne’ebé hela besik, no iha tempu hanesan bele halo sai fatin turístiku ne’ebé iha benefísiu ba ekonomia.

Tuir agenda iha tersa semana ne’e, Xefe Estadu ho nia komitiva tomak sei kontinua ba hala’o diálogu komunitáriu iha suku Muapithine, Postu Administrativu Lospalos.

Iha diálogu entuziástiku ne’e. Xefe Estadu hetan akompañamentu hosi Sekretária Estadu Promosaun Igualdade, Sra. Idelta Rodrigues, bainaka especial Xefe Estadu nian, Administradór Postu Administrativa Hatubelico, Munisípiu Ainaro no Xefe Suku Bikeli, Postu Administrativa Ataúru, Munisípiu Dili.