S.E. Prezidente Repúblika, Taur Matan Ruak, Hala’o DiÁlogu Komunitáriu ho Komunidade Suku Muapitine no Cacavei

by Media Team Posted on

custom_gallery
images not found
Muapitine, Lospalos 28 Janeiru 2015 – S.E. Prezidente Repúblika, Taur Matan Ruak, kontinua hala’o diálogu komunitáriu ba loron daruak nian ho komunidade iha suku Muapitine, iha parte dadeer nian no iha parte lokraik iha suku Cacavei, postu administrativu Lospalos, munisípiu Lautem, iha tersa-feira ne’e.

Iha intervensaun ba komunidade sira iha Suku Muapitine no Cacavei nian, Xefe Estadu esplika objetivu nia vizita ba membru komunidade sira:

“Ha’u mai vizita atu apresia imi-nia kontribuisaun, rona imi-nia hanoin, haree imi-nia realidade, haree saida maka Governu halo ona no ladauk halo, i ida fali atu kompara suku ida ho suku seluk.”

Xefe Estadu esplika liután:

Ita sei iha problema kona-ba administrasaun no jestaun. Imi ohin dehan imi-nia Estrada aat. Maibé, hakarak atu hatete ba imi katak, estrada iha suku barak liu ne’ebé ha’u vizita ona aat liu estrada suku Muapitine nian. Tanba ne’e aproveita husu ba imi Muapitine imi tenke hamutuk tanba Muapitine iha imi-nia liman.

Iha sesaun perguntas no hatán, Xefe Suku Muapitine ho nia komunidade sira aprezenta sira-nia preokupasaun boot hirak ne’ebé maka komunidade suku ne’ebé refere hasoru. Nu’udar ezemplu, kona-ba lagoa Iralalaru ne’ebé iha tempu udan bee sa’e no fó ameasa ba komunidade nia plantasaun, inklui mós ameasa boot ba komunidade sira-nia vida tanba, lafaek aproveita sa’e tuir atu ataka (tata) komunidade sira, no mós komunidade nia animál hirak. Nune’e, komunidade sira husu atu dezvia bee lagoa ba tasi atu labele fó risku ba komunidade.

Hatán ba ida-ne’e, Xefe Estadu dehan katak, nia sei rejista no lori ba ko’alia ho Primeiru Ministru, Xanana Gusmão, atu oinsá maka buka rezolve kestaun ne’ebé Xefe Suku no komunidade sira levanta. Maibé, dehan mós katak atu dezvia bee lagoa Iralalaru ba tasi presiza halo uluk estudu ida atu nune’e labele afeta ba degradasaun rai.

Wainhira hatán kona-ba preokupasaun sobre lafaek, Xefe Estadu dehan katak, sei buka alternativa atu oinsá rezolve preokupasaun hirak-ne’ebé refere para atu hapara ameasa husi lafaek ba komunidade no sira-nia animál hirak. Esplika liután mós katak, lafaek bele sai atrasaun turístika ida ne’ebé lori rendimentu ba komunidade iha suku Muapitine hanesan iha Austrália, iha ne’ebé ema tenke seluk AUS$ 32 somente atu ba haree de’it

Iha nia terseira vizita ba suku Cacavei, Xefe Estadu, kontinua realsa filafali mós sobre pontu prinsipál hirak ba autoridade lokais no komunidade sira hodi husu ba sira atu serbisu hamutuk/koopera, tenke iha kriatividade atu hatán ba preokupasaun hirak ne’ebé maka sira hasoru iha suku Cacavei nia laran.

Xefe Estadu mós la haluha atu fó hanoin ba membru komunidade sira atu labele haluha koopera no buka informasaun/alternativas atraves ajénsia Estadu hirak ne’ebé maka kompetente atu hatán ba sira-nia preokupasaun hirak duke tuur de’it maka hein solusaun.

Hanesan nia vizita uluk, Xefe Estadu hetan nafatin akompañamentu husi S.E. Sekretária Estadu Promosaun Igualdade, Sra. Idelta Rodrigues, reprezentante husi sekretáriu Estadu Asuntu Veteranu no Antigo Kombatente, Administradór munisípiu Lautem, bainaka espesiál Xefe Estadu nian, Administradór postu administrativu Hatubelico, munisípiu Ainaro, Xefe Suku Bikeli, postu administrativa Ataúru, munisípiu Dili, no mós autoridades lokál ba munisípiu Lautem nian.

Ikusmai, informa mós katak, hafoin remata diálogu komunitáriu no deskansa iha suku Cacavei, Xefe Estadu ho nia komitiva kontinua kedas nia atividade diálogu komunitáriu iha suku Leuro.