S.E. PREZIDENTE REPÚBLIKA HALA’O DIÁLOGU KOMUNITÁRIU IHA SUKU LEURO NO SORU

by Media Team Posted on

Munisípiu Lautem, 28 Janeiru 2015 – S.E. Prezidente Repúblika, Taur Matan Ruak, kontinua nia vizita no diálogu komunitáriu ba loron datoluk ho komunidade sira iha suku Leuro (iha dadeer) no suku Soru (iha lokraik), iha postu administrativu Lospalos, munisípiu Lautem, iha kuarta no kinta-feira

Iha nia intervensaun iha suku rua refere, Xefe Estadu husu atu komunidade iha suku Leuro no Soru atu iha unidade, buka serbisu hamutuk no partisipa ativamente iha prosesu dezenvolvimentu nia laran atu lori Timor-Leste ba oin.

Iha diálogu ho komunidade Leuro, Xefe Estadu dehan:

Daudaun ne’e ita sei iha difikuldades hanesan estrada aat, bee moos, kondisaun uma. Maibé, dezafiu hirak-ne’e hanesan temporáriu de’it. Ita tenke prontu hasoru dezafiu loroloron iha ne’e atu hadi’ak ita-nia moris, labele haree dezafius hanesan obstákulu.”

Xefe Estadu mós dehan:

Ami la haluha Leuro, so ke ita barak. Tanba ne’e, Estadu fó tuir kbiit ne’ebé maka iha. Mais, ita-nia vontade no determinasaun maka ne’e, Timor-Leste labele ba kotuk. Maibé, ida-ne’e depende ba ita, sei ita ko’alia barak la iha asaun, ne’e ita hela iha kotuk.”

Hafoin Prezidente Repúblika fó hanoin mós ba membru komunidade sira:

“Se imi bele sai eroi ba libertasaun Timor-Leste nian, imi mós bele sai eroi ba prosesu dezenvolvimentu.”

Xefe Estadu rekoñese katak, Estadu mós halo buat barak ona, balun maka seidauk, tanba ne’e husu komunidade sira atu iha pasiénsia. Nia mós informa liután ba komunidade suku rua katak, Leuro no Soru nia naran boot tebes iha prosesu luta ba Ukun Rasik-An. Tanba ne’e, husu atu komunidade sira iha suku rua atu mantein nafatin naran boot ne’e iha prosesu konstrusaun Estadu nian.

Iha Prezidente Repúblika nia sorumutu komunitáriu ho suku Soru, aprezenta mós preokupasaun hirak ne’ebé kuaze hanesan ba Estadu, hanesan, seidauk iha asesu ba bee moos, valorizasaun veteranu ne’ebé ladauk fó sai no la tuir dedikasaun loloos. Aprezenta mós iha diálogu komunitáriu Soru sobre preokupasaun boot kona-ba terras propriedade, no mós lakunas hirak balun, liuliu ba eskola sekundáriu iha suku ne’ebé refere.

Iha nia mensajen seluk ba membru komunidade suku Soru, S.E. Prezidente Repúblika Taur Matan Ruak mós fó hanoin pontu importante ida ba partisipante diálogu sira:

Estadu koko atu trata asuntu sira ida por ida, laiha buat ida maka imposivel, mais importante maka atu ita labele lakon esperansa iha vida.”

Membru komunidade mós sujere ba S.E. Prezidente Repúblika no mós Governu atu konsidera no halo esforsu liután atu oinsá kria oportunidade iha ne’ebé bele absorbe maka’as juventude sira ne’ebé maka laiha serbisu, hanesan kondisaun sira-ne’ebé maka atrai juventude sira seluk ba serbisu iha Inglaterra.

Sekretária Estadu Promosaun Igualdade, Sra. Idelta Rodrigues, reprezentante Sekretáriu Estadu Asuntu Veteranu no Antigo Kombatente, administradór munisípiu Lautem, bainaka espesiál Xefe Estadu nian, administradór postu administrativu Hatubelico, munisípiu Ainaro, Xefe Suku Bikeli, postu administrativu Ataúru, munisípiu Dili no mós autoridades lokál sira maka akompaña Xefe Estadu iha diálogu rua ne’ebé maka hala’o ne’e.