Saida Mak Konstituisaun Dehan Kona-Ba Demisaun Governu.

by Media Team Posted on

Dili, 09 Fevereiru 2015 – Nota klarifikasaun bazeia ba Konstituisaun RDTL.

  1. Tuir Konstituisaun nia art. 112 b) katak, aseitasaun ba pedidu rezignasaun Primeiru Ministru nian sei rezulta iha Governu nia demisaun
  1. Prezidente Repúblika mesak de’it mak kaer kompeténsia atu simu pedidu rezignasaun Primeiru Ministru nian tuir art. 112 b) husi Konstituisaun.
  1. Tuir Konstituisaun nia art. 91, nr. 1 b), Konsellu Estadu mak bele “Fó sai kona-ba demisaun Governu nian” molok ka hafoin Prezidente foti tiha desizaun, tanba Konsellu Estadu hanesan órgaun konsulta Prezidente Repúblika nian tuir art. 90 Konstituisaun nian.
  1. Desizaun kona-ba demisaun Primeiru Ministru nian hanesan atu polítiku Prezidente Repúblika nian ne’ebé sei rezulta iha Primeiru Ministru nia ezonerasaun no Governu nia demisaun hafoin nomeia tiha no fó tiha pose ba Primeiru Ministru foun ho membru Governu foun, tuir art. 86 g) no h) Konstituisaun nian. Enkuantu seidauk fó pose ba Primeiru Ministru no Governu foun, Primeiru Ministru no Governu tuan sei hala’o nafatin sira-nia knaar jestaun baibain nian hodi hala’o atu sira-ne’ebé nesesáriu ba jestaun Estadu nian, ba interese públiku no mós ba tranzisaun governativu.
  1. Prezidente Repúblika rona partidu polítiku kona-ba prosesu nomeasaun Governu nian tuir Konstituisaun nia art. 106, nr. 1. Primeiru Ministru hili husi partidu ida ne’ebé hetan votu barakliu iha eleisaun lejizlativa ida ikus, ka husi aliansa partidu sira-ne’ebé hetan votu barakliu, tuir buat hirak ne’ebé temi iha art. 106, nr. 1 Konstituisaun. Prezidente Repúblika hamutuk ho partidu polítiku sira-ne’ebé reprezenta iha Parlamentu Nasionál, bele buka solusaun governativa ida-ne’ebé di’ak liu.
  1. Hafoin hili tiha Primeiru Ministru, Primeiru Ministru foun ne’e bele hato’o ninia proposta kona-ba membru Governu sira seluk ba Prezidente Repúblika hodi foti desizaun tuir Konstituisaun nia art. 106, nr. 2.
  1. Prezidente Repúblika mak sei fó pose ba membru sira Governu nian tuir art. 86 h) Konstituisaun nian.