S.E. PREZIDENTE REPÚBLIKA, TAUR MATAN RUAK, SIMU KARTA KREDENSIAIS EMBAIXADORES HOSI NASAUN 15

by Media Team Posted on

Dili, 17 Fevereiru 2015 – S.E. Prezidente Repúblika, Taur Matan Ruak simu karta kredensiais hosi Embaixadores Estraordináriu no Plenipotensiáriu hosi país 15, iha segunda-feira ne’e iha Palásiu Prezidente Nicolau Lobato.

País hirak ne’ebé nia embaixadores aprezenta karta kredensiais ba Xefe Estadu mak hanesan tuirmai:

  •   País 3 hosi Sudeste Aziátiku :Tailándia, Singapura no Myanmar
  •   País 9 hosi Kontinente Europa: Finlándia, Dinamarka, Irlanda, Suésia, Xipre, Béljika, Suisa, Reinu Unidu no Bulgária
  •   País hosi Amérika Latina: Ekuadór
  •   Áfrika Osidentál: Giné Ekuatoriál
  •   Pasífiku: Vanuatu.

Informa mós katak, serimónia entrega Kredensiál fahe ba parte rua, dadersan no lokraik, iha dadersan hahú iha tuku 8 dadersan ho Embaixadór Buskron Prugsapongs hosi Reinu Tailándia tuir fali hosi Embaixadór Sudesh Maniar hosi Repúblika Singapura, Embaixadór Paivi Marjatta Hiltunen-Toivio hosi Repúblika Finlándia, Embaixadór Casper Klyngem hosi Reinu Dinamarka, Embaixadór Rodrigo Riofrio Machuca hosi Repúblika Ekuadór, Embaixadór Geoffrey Keating hosi Repúblika Irlanda, Embaixadora Johanna Brismar Skoong hosi Reinu Suésia, Embaixadora Loanna Malliotis hosi Illa Repúblika Xipre, Embaixadór Patrick Hermann hosi Reinu Béljika, no remata ho Embaixadór U San Myint Oo hosi Repúblika Uniaun Myanmar.

Iha serimónia entrega Kredensiál ne’ebé hala’o iha lokraik, Xefe Estadu, kontinua hodi hahú simu karta kredensiál hosi Embaixadór Kalfau Kaloris hosi Repúblika Vanuatu, tuir fali Embaixadora Yvonne Baumann hosi Repúblika Federal Suisa, Embaixadór José Dougan Chubum hosi Repúblika Giné Ekuatoriál, Embaixadór Moazzam Malik hosi Reinu Unidu no termina ho Embaixadór Sergey Michev hosi Repúblika Bulgária.

Hosi embaixadores país sanulu-resin-lima ne’e, Embaixadór Tailándia maka rezidente iha Dili no restu sira seluk rezide/hela iha Jakarta, Canberra, Peking, Singapura no Lizboa.

Durante iha apresentasoins karta kredensiais refere, Embaixadór sira iha sira-nia diskursu kompromete buka hametin di’ak liután relasoins no kooperasaun ho Timor-Leste iha setór dezenvolvimentu oioin.

La haluha mós atu informa katak, ofisiál boot seluseluk, hanesan S.E. Ministru Negósiu Estranjeiru, Hernani Coelho, ho mós nia Vise, Roberto Soares, partisipa iha sesaun rua ne’e hotu hamutuk ho Xefe Casa Civil, Sr. Fidelis Leite Magalhães, no mós konselleiru tékniku Prezidénsia nian sira.