S.E. PREZIDENTE REPÚBLIKA HALO DIÁLOGU KOMUNITÁRIU HO POPULASAUN SUKU KOTOLAU NO SUKU TALITU

by Media Team Posted on

Dili, 24 Fevereiru 2015 – S.E. Prezidente Repúblika, Taur Matan Ruak, hala’o diálogu komunitáriu ho populasaun iha suku Cotolau no suku Talitu, postu administrativu Laulara, munisípiu Aileu iha segunda-feira ne’e.

Iha diálogu ho Xefe Estadu, komunidade suku rua hato’o sira-nia preokupasaun kona-ba fasilidade eskola ne’ebé seidauk kompletu, falta profesores no atribuisaun bolsa-estudu ba estudante husi família kbiit-laek sira.

Hatán ba komunidade sira-nia preokupasaun ne’e, Xefe Estadu rekoñese hodi hatán katak, problema edukasaun hanesan problema ida boot iha Timór laran tomak, ho razaun katak:

“Kresimentu populasaun tinatinan aumenta maka’as mas investimentu ba edukasaun seidauk maka’as. Ita sei aumenta (investimentu ba edukasaun) so ke sei lori tempu”, dehan Xefe Estadu.

Hafoin ida-ne’e, Xefe Estadu halo apelu ba ema hotu-hotu, parte governu no la’ós governu nian hodi dehan:

“Ita inan-aman tenke ajuda. Kooperasaun entre profesores, inan-aman, autoridade, ne’e importante. Tanba ida-ne’e, ita la ko’alia kona-ba família mas ita ko’alia kona-ba nasaun.”

Xefe Estadu mós husu atu Ministériu Edukasaun bele iha jestaun ida-ne’ebé di’ak atu bele identifika problema hirak iha baze, atu nune’e bele responde populasaun sira-nia nesesidade ho di’ak. Tanba Xefe Estadu dehan:

“Ministériu Edukasaun tenke iha baze de dadus ida ne’ebé di’ak, atu nune’e problemas sira hanesan kolokasaun profesores, labele iha fatin balu profesores barak liu, fatin seluk profesores menus.”

Kona-ba atribuisaun bolsa-estudu, Xefe Estadu hatán:

“Realmente bolsa-estudu fó ba sira-ne’ebé mellor”.

Xefe Estadu klarifika liután hodi fó hanoin katak, kondisaun inan-aman ne’ebé maka kbiit-laek sei la garante katak sira-nia oan bele hetan bolsa-estudu. Tanba, oan sira presiza tuir no liu konkursu, atu hetan bolsa-estudu. Tanba, kualidade alunus sira-ne’ebé di’ak depende filafali ba eskola.

Hafoin diálogu remata S.E. Prezidente Repúblika Taur Matan Ruak hala’o mós vizita ba iha klínika Cotolau hodi haree kondisaun servisu iha postu saúde refere.

Informa mós katak, komitiva vizita ba munisípiu Aileu nian inklui mós na’i-ulun sira seluk hanesan, Vise Ministru Estatál, Dr. Tomas Cabral, Membru Komisaun F Parlamentu Nasionál, Duarte dos Santos, Administradór Postu Administrativu Soibada, Munisípiu Manatuto no Xefe Suku Afaloikai, munisípiu Viqueque.