INTERVENSAUN HOSI S.E. PREZIDENTE REPÚBLIKA DEMOKRÁTIKA TIMOR-LESTE, TAUR MATAN RUAK IHA KONFERÉNSIA ASIAN ELECTORAL STAKEHOLDER FORUM NIANKONA-BA “PROSESU ELEITORÁL DEMOKRÁTIKU–REALIDADE NO DEZAFIU SIRA”

by Media Team Posted on

Díli, loron18 fulan-Marsu, tinan 2015

Exelénsia sira.

Ilustre vizitante no konvidadu sira.

Nu’udar onra ida atu simu Vossa Exelénsia sira iha Timor-Leste.

Hodi povu Timor-Leste nia naran no ha’u-nia naran rasik, ha’u hato’o benvindu kmanek ba Ita-Boot sira hotu ne’ebé marka prezensa. Nu’udar satisfasaun ida atu simu reprezentante sira hosi organizasaun sira ne’ebé serbisu atu haklean transparénsia no rigór ba prosesu eleitorál sira.

Restaurasaun Independénsia Timor-Leste nian, ne’ebé rezulta hosi povu Timor-Leste nia kapasidade sakrifísiu no determinasaun boot, taka ho aktu demokrátiku ida ba auto-determinasaun.

Oportunidade atu vota, iha tinan 1999, hetan adezaun no partisipasaun maka’as hosi ami-nia povu. Konsulta demokrátika ida-ne’e sai nu’udar pontu virajen ida iha ami-nia istória.

Fundasaun demokrátika Estadu Timor-Leste nian ida-ne’e konfirma tiha ona, no reforsa tiha ona, hosi ami-nia instituisaun polítika sira-nia prátika iha tinan 12 dahuluk Independénsia nian.

Instituisaun sira ne’ebé ami dezenvolve daudaun ne’e nu’udar rezultadu hosi funsionamentu ba demokrasia eleitorál ida ne’ebé partisipada no vibrante.

—X—

Tanba ne’e, nu’udar buat ida mak apropriadu katak Forum Aziátiku ba Parte Interesadu Eleitorál Daruak ida-ne’e sai nu’udar pontu enkontru ba belun barak ho prioridade no preokupasaun sira ne’ebé hanesan.

Ha’u sauda membru sira hotu hosi Forum Aziátiku ba Parte Interesadu Eleitorál no mós Rede Aziátika ba Eleisaun Livre.

Ha’u sauda reprezentante sira hosi instituisaun ofisiál eleitorál no parte interesadu eleitorál sira seluk hosi rai 17 Ázia no Pasífiku nian.

Ha’u-nia saudasaun mós hato’o ba partisipante sira hosi país sira CPLP Komunidade ba Rai sira-ne’ebé Ko’alia Lian Portugés nian.

Fórum ida-ne’e sai nu’udar oportunidade ida atu promove kontaktu no aumenta koñesimentu mútua entre parte interesadu eleitorál sira hosi ita-nia kontinente no família CPLP nian, ne’ebé Timor-Leste iha ligasaun tanba lasu kulturál no istóriku, no ne’ebé ami hetan onra atu prezidi komunidade ne’e iha tinan rua nia laran, hosi tinan 2014-2016.

Exelénsia sira.

Belun sira.

Ami nu’udar nasaun ida ho tinan 12 hetan nia independénsia. Ami-nia instituisaun sira hala’o daudaun dezenvolvimentu tomak no kontinua atu halo konsolidasaun.

Iha tinan badak sira-ne’e ami hala’o aktu eleitorál ualu, inklui iha kontajen, eleisaun ba Asembleia Konstituente, iha tinan 2001, no eleisaun prezidensiál, iha tinan 2002, ne’ebé organiza ho protesaun Nasoins Unidas nian iha momentu molok hala’o aktu ofisiál ba Restaurasaun Independénsia iha loron 20 fulan-Maiu tinan 2002.

Ha’u hakarak subliña ba Ita-Boot sira kona-ba ami-nia nasaun nia rekoñesimentu ba Nasoins Unidas no komunidade internasionál, ba apoiu atu organiza eleisaun sira-ne’e no, en jerál, ba asisténsia valioza bodik ba servisu konsolidasaun institusionál, ne’ebé ami kontinua hala’o.

Ha’u mós iha satisfasaun atu hatete ba Ita-Boot sira katak progresu iha parseria sira-ne’e, ba ami, sai nu’udar kapitál experiénsia importante ida ne’ebé kontribui atu ami konsolida di’ak liután instituisaun sira, no mós reforsa estabilidade sosiál no polítika.

Ha’u sei la hola tan tempu naruk ho barak liu atu ko’alia kona-ba promenór sira ba progresu ne’ebé ami hala’o tiha ona. Iha sesaun traballu sira Fórum ida-ne’e nian, señor komisáriu Francisco Vasconselos no señor Mari Alkatiri—Primeiru Ministru ba dahuluk Timor-Leste nian—sei refere rasik kona-ba kestaun sira prátika eleitorál nian no konsolidasaun ba Demokrasia.

Ha’u sei subliña de’it, agora, katak ami-nia instituisaun sira toma nota tiha ona kona-ba lisaun aprendida sira, ne’ebé iha tinan 2012, iha tinan aniversáriu ba dala 10 Independénsia nian, ami organiza asaun eleitorál tolu tuituir malu ho ami-nia meius no know-how sira rasik.

Hodi nune’e, misaun Nasoins Unidas nian ida ne’ebé sei akompaña ami mós prontu hela atu apoia ami, se karik iha nesesidade. Maibé ba satisfasaun boot, hosi parte Nasoins Unidas no mós hosi ami hotu, Timoroan sira, intervensaun ida-ne’e defaktu la presiza.

Organizasaun no lojístika ba aktu eleitorál sira ne’e ezijente duni, maibé ami-nia instituisaun sira iha kbiit atu hatan ba dezafiu sira.

Eleisaun sira oin-oin hetan partisipasaun maka’as no la’o ho hakmatek. Eleisaun sira-ne’e unanimamente hetan rekoñesimentu katak transparente no rigoroza hosi parte interesadu eleitorál sira no mós hosi misaun observasaun internasionál sira ne’ebé akompaña kampaña eleitorál sira ne’ebé hala’o no mós prosedimentu respetivu sira ba sufrájiu no eskrutíniu.

Servisu exelente ne’ebé rezulta tenke atribui tanba determinasaun firme hosi ami-nia sidadaun sira—ho sira-nia opsaun klaru no reiteradu ba estabilidade no demokrasia.

Maibé seguransa aparellu tékniku eleitorál nian, kapasidade atu hala’o servisu hosi ami-nia ajénsia eleitorál sira, merese hetan destáke.

Esperiénsia no koñesimentu ne’ebé Timor-Leste hetan iha área ida-ne’e, foin lalais ne’e hato’o ba iha servisu ba espresaun vontade demokrátika povu Giné-Bissau nian, nu’udar nasaun maun-alin hosi Komunidade ba Rain sira-ne’ebé Ko’alia Lian Portugés iha Áfrika Osidentál.

Ajénsia eleitorál ofisiál sira Timor-Leste nian hala’o knaar signifikativu iha apoiu atu organiza eleisaun lezislativa no prezidensiál Giné nian iha tinan kotuk, no tanba ida-ne’e, ho satisfasaun boot liu mak Timor-Leste, oras ne’e, simu prezidente Komisaun Nasionál Eleisaun Giné nian.

Ha’u-nia parabéns hato’o ba membru sira Komisaun Nasionál Eleisaun no Sekretariadu Tékniku ba Administrasaun Eleitorál nian ba sira-nia kapasidade realizasaun no efikasia ne’ebé hatene aplika ba operasaun eleitorál sira ne’ebé sira intervein. Ha’u-nia hako’ak hato’o ba membru sira hotu CNE no STAE nian, inklui sira-nia responsável atuál no anteriór sira.

Permiti mós ha’u atu subliña kona-ba forsa seguransa sira-nia knaar efikás iha operasaun eleitorál tinan 2012 nian.

Asaun ne’ebé laiha falla hosi Polísia Nasionál no nia partisipasaun desiziva no kompetente iha operasaun lojístika ne’ebé harii ba aktu eleitorál sira, kontribui ba ambiente konfiansa, seguransa no liberdade ne’ebé karakteriza kampaña eleitorál sira, sufrájiu no eskrutíniu.

—X—

Susesu iha operasaun eleitorál sira sai nu’udar indikadór ba ami-nia instituisaun nurak sira-nia konsolidasaun. Bele mós toma hanesan insentivu, no mós hanesan ezemplu atu la’o tuir, ba Administrasaun Públika, en jerál.

Se partisipasaun ajénsia sira Estadu nian ne’e sai nu’udar fatór xave ba iha susesu prosesu eleitorál sira, ami-nia esperiénsia hatudu katak ambiente sosiál no konfiansa sidadaun sira-nian sai nu’udar fatór sira ne’ebé verdadeiramente desizivu.

Kazu Giné-Bisau nian, mak ha’u refere tiha ona, ne’ebé sidadaun sira iha determinasaun atu rekupera normalidade konstitusionál no espresa sira-nia vontade demokrátika, konfirma konkluzaun ne’ebé ami foti hosi esperiénsia eleitorál iha ami-nia rain, dezde tinan 1999.

Informasaun, envolvimentu no partisipasaun sidadaun sira-nian sai nu’udar kondisaun indespensável ida ba prosesu eleitorál ne’ebé la’o ho susesu.

Ha’u-nia maun Xanana Gusmão, orsida tan, sei ko’alia ba Ita-Boot sira kona-ba sosiedade sivil nia partisipasaun iha dezenvolvimentu Estadu demokrátiku.

Sidadaun sira-nia partisipasaun tomak no envolvimentu sosiedade sivil nian ne’e sai indespensável ba implementasaun prioridade sira konstrusaun nasionál nian, ne’ebé oras ne’e ami hala’o namanas.

Ho de’it sidadaun empeñadu sira, ne’ebé asumi responsabilidade, ami sei bele implementa prioridade nasionál sira dezenvolvimentu nian, ne’ebé okupa ami, oras ne’e, mak ami harii baze institusionál Estadu nian no ami konkista pás no estabilidade sosiál.

Organizasaun sosiedade sivil sira-nia partisipasaun iha sidadaun sira-nia envolvimentu no sira-nia informasaun no esklaresimentu, sai nu’udar kontributu importante atu ita alkansa transparénsia iha asaun Administrasaun nian.

Sein iha sidadaun sira-nia partisipasaun ativa la’ós de’it iha prosesu eleitorál sira, maibé asumi responsabilidade iha prosesu dezenvolvimentu ne’ebé afeta sira no sira-nia komunidade, sei la sai posível atu asegura transparénsia, nein iha prestasaun konta ne’ebé di’ak hosi parte Estadu.

Ha’u hakarak halo referénsia espesiál ida ba Ita-Boot sira kona-ba feto sira-nia partisipasaun. Porsentu lima-nulu hosi sidadaun sira, sertamente, mesak feto. Feto sira asumi responsabilidade boot iha nutrisaun, edukasaun, saúde no ekonomia família nian. Maski nune’e, sira-nia kontribuisaun, sira-nia importánsia iha sosiedade, iha kazu barak, kontinua la hetan valorizasaun.

Urjente atu ita serbisu hodi valoriza feto sira-nia asaun, hamutuk ho mane sira, iha sosiedade no insentiva sira-nia partisipasaun iha harii nasaun.

Valorizasaun sosiál ba feto sira sai esensiál ba susesu hosi ita-nia projetu dezenvolvimentu nasionál.

Dezde tempu barak, ha’u defende tiha ona katak organizasaun sosiedade sivil sira-nia partisipasaun ne’e importante atu ami alkansa objetivu promosaun sosiál no ekonómika ba feto sira Timor-Leste nian.

Exelénsia sira. Prezadu belun sira.

Reuniaun Fórum Aziátiku ba Parte Interesadu Eleitorál Daruak ida-ne’e iha Dili sai nu’udar indikadór ba Timor-Leste nia integrasaun iha vida rejionál, no komunidade internasionál nian, en jerál.

Ba razaun ida-ne’e, simu Ita-Boot sira, nu’udar motivu satisfasaun boot liután mós.

Ami-nia esperiénsia luta libertasaun nasionál nian, ne’ebé akompaña hosi polítika ba pás, amizade no rekonsiliasaun ne’ebé ami adota hafoin tiha Restaurasaun Independénsia, konfirma ami-nia konviksaun profunda katak diálogu no konsertasaun ba interese sira ne’e sai nu’udar dalan ba estabilidade indespensável ba dezenvolvimentu.

Ami nia rain kontribui ho empeñamentu ba pás no seguransa iha rejiaun, liuhosi ami-nia partisipasaun iha prosesu multilaterál oin-oin no relasaun amizade no kooperasaun bilaterál intensa ho Indonézia, Austrália, no poténsia sira seluk hosi Ázia no Pasífiku.

Ami iha relasaun ne’ebé furak ho Estadus Unidus, Xina, Índia, Japaun, Repúblika Korea, Nova Zelándia, aleinde naturalmente liuhosi relasaun amizade no viziñansa di’ak ho Estadu membru sira ASEAN nian, nu’udar organizasaun ne’ebé ami hakarak adere ba no ne’ebé ami halo tiha ona parte iha prosesu importante sira ba kooperasaun no seguransa rejionál.

Ami iha relasaun ba kooperasaun intensa no amizade mós ho Uniaun Europeia, no ho ninia Estadu membru sira oin-oin iha nível bi-laterál, ne’ebé sai nu’udar parseiru ativu iha prosesu sira ba ami-nia dezenvolvimentu.

Maibé nune’e mós, hanesan ha’u refere tiha ona, ami iha relasaun espesiál amizade nian iha CPLP, ne’ebé integra Angola, Brazil, Kabuverde, Giné-Bisau, Mosambike, Portugál, Saun Tomé no Prínsipe, nu’udar país sira-ne’ebé ami iha ligasaun tanba istória komun no lasu kulturál ne’ebé forte- no nune’e mós, Giné-Ekuatoriál, ne’ebé adere foin lalais ne’e ba iha Komunidade ne’e. Timor-Leste hakarak atu kontribui, hodi nune’e nasaun maun-alin ida-ne’e, nu’udar membru foun ida CPLP nian, integra nia an no partilla plenamente valór sira-ne’ebé sai nu’udar marka identidade ba ami-nia Komunidade.

Exelénsia sira.

Ho satisfasaun, ha’u bele afirma ba Ita-Boot sira katak transparénsia eleitorál no konfiansa iha funsionamentu ba iha demokrasia, revela tiha ona instrumentu importante sira iha sosiedade Timor-Leste nia moris.

Importante, la’ós de’it ba estabilidade ne’ebé ami-nia país goza; importante mós ba kriasaun konsensu balu, sai transversál ba partidu polítiku sira ne’ebé reprezenta iha ami-nia Parlamentu Nasionál, buat ne’ebé permiti tiha ona atu estabelese unidade ida mak loloos iha asaun, ne’ebé iha relasaun ho ami-nia prioridade sira dezenvolvimentu nasionál nian.

Transparénsia eleitorál, prestasaun konta no transparénsia vida polítika nian en jerál sai nu’udar fatór indespensável ba instituisaun sira-nia efisiénsia no ba funsionamentu mekanizmu no prosedimentu nian ba governasaun di’ak.

Deklarasaun Bangkok ne’ebé hetan akordu iha Forum Áziatiku ba Parte Interesadu Eleitorál ba Dahuluk, iha tinan rua tiha ona, rekoñese katak:

“Eleisaun Livre no Justa sai nu’udar pre-kondisaun ida ba demokrasia no promotora ba dezenvolvimentu sosiál, polítiku no ekonómiku.”

Ba Timor-Leste ne’e nu’udar onra ida atu hamutuk ho Ita-Boot sira iha liña oin atu hala’o servisu ida-ne’e, hodi kontribui atu implementa vizaun ida-ne’e no reforsa prátika eleitorál no demokrátika sira.

Prátika sira-ne’e mak kria ambiente ne’ebé favoravel ba ita-nia povu sira-nia dezenvolvimentu no moris-di’ak.

Ba partisipante sira hotu Fórum Daruak ida-ne’e nian, ha’u hato’o ha’u-nia votu servisu di’ak no estadia ida ne’ebé furak iha Timor-Leste.

Obrigadu ba Ita-Boot sira-nia atensaun.