S.E. PREZIDENTE REPÚBLIKA HALO AUDIÉNSIA HO MOVIMENTU BA RENOVASAUN KARISMÁTIKA KATÓLIKA DIOSEZE DILI

by Media Team Posted on

Dili, 13 Maiu 2015 – S.E. Prezidente Repúblika, Taur Matan Ruak, simu iha audiénsia Movimentu ba Renovasaun Karizmátika Katólika hosi Dioseze Dili, tersa-feira ne’e iha Palásiu Prezidente Nicolau Lobato.

Objetivu hosi audiénsia refere, atu konvida Xefe Estadu atu ba partisipa iha retiru movimentu ne’e nian ne’ebé tuir planu sei hala’o iha Munisípiu Bobonaro no Covalima.

“Ami mai konvida Sr. Prezidente Repúblika atu sai oradór ba retiru ne’ebé ami sei hala’o iha Maliana no Suai”, dehan Koordenadór Movimentu ba Renovasaun Karismátika Katólika, Amandio Pinto Pereira, ba imprensa sira hafoin remata audiénsia ho Xefe Estadu.

Nia hatutan objetivu konvida Xefe Estadu, tanba Xefe Estadu hanesan aman ba nasaun no oinsá maka bele fó hanoin ba joven no populasaun sira para bele moris iha hakmatek no domin nia laran.

Haktuir Xefe Estadu nia liafuan durante sorumutu, koordenadór ne’e esplika ba jornalista sira hodi dehan katak, Xefe Estadu apoiu inisiativa refere, no la promote tanba agenda barak. Maibé, Xefe Estadu sei halo ajustamentu ba ajenda iha vizita suku sira.