S.E. PREZIDENTE REPÚBLIKA INAUGURA JARDÍN S. FRANCISCO XAVIER NO UMA LAKU IHA DARE

by Media Team Posted on

Dili, 14 Maiu 2015 – S.E. Prezidente Repúblika, Taur Matan Ruak, akompañadu hosi Bispu Dioseze Baucau no Administradór Apostóliku Dioseze Dili, Don Basilio do Nascimento, halo inaugurasaun ba Jardín Saun Francisco Xavier no Uma Laku Dare, iha Parókia Dare, postu administrativu Kristu Rei, Munisípiu Dili, kinta-feira ne’e.

Jardín no Uma Laku (fatin ba halo misa kampál) ne’ebé refere hanesan oferta ida hosi família Uma-Lisan Fatu-Ssuca Mali-Mera ho nia bei-oan sira ba Parókia Dare nian.

Iha nia lia-menon Xefe Estadu hato’o nia agradesimentu barak ba família Uma-Lisan Fatu-Ssuca Mali-Mera ho nia bei-oan sira ne’ebé ho laran tomak oferese ona jardín no Uma Laku ba Parókia Dare.

“Prezidente Repúblika agradese ba família nia inisiativa ida-ne’e. Ha’u kontente loos tanba Ita-nia kontribuisaun bele hadi’a ita-nia igreja”, dehan Xefe Estadu.

Xefe Estadu impresionadu tebes ho serbisu Padre Pároku no sarani sira ne’ebé serbisu hamutuk no/ka kolabora malu hodi halo obra ne’ebé iha kualidade no halo iha fulan ida nia laran de’it.

Ikusliu, Xefe Estadu hatete Dare hanesan fatin importante ne’ebé hamoris lider sira, tantu ba Igreja no Estadu, ho ne’e Xefe Estadu husu katak Dare naran boot ba nafatin husi jerasaun ba jerasaun.

Hafoin inaugurasaun remata, kontinua tutan ho misa ne’ebé Bispu Dioseze Baucau no Administradór Apostóliku Dioseze Dili, Don Basilio do Nascimento, mak dirije.