S.E. PREZIDENTE REPÚBLIKA PARTISIPA IHA SEREMÓNIA KO’A BANI-BEEN

by Media Team Posted on

Dili, 25 Maiu 2015 – S.E. Prezidente Repúblika, Taur Matan Ruak, hamutuk ho Ministru Turizmu Francisco Kalbuady Lay, partisipa iha serimónia ko’a bani-been ne’ebé maka Komunidade Uma-Lisan Manu La Mea hala’o, iha suku Cribas, postu administrativu Manatuto Vila, munisípiu Manatuto, iha sábadu dadeer-saan iha semana kotuk.

Hafoin partisipa tiha prosesu ko’a bani-been ne’ebé refere, Xefe Estadu hatete ba imprensa sira ne’ebé halo kobertura ba eventu ne’e katak: “Ha’u kontente loos, ne’e hanesan oportunidade ida promove inisiativa komunidade sira-nian, liga ba sira-nia kultura, forma oinsá maka hetan rekursus ne’ebé natureza husik hela ba sira atu dezenvolve sira-nia vida. Saida maka ita halo é promove para ema hatene, para ke dada interese ema nian, sé maka hakarak hemu bani-been orijinál no bani-isin, Abríl tinan oin bele mai rasik iha ne’e.”

Xefe Estadu haktuir tan katak, tinan oinmai, nia hakarak filafali ba partisipa dala ida tan iha fulan-Abríl. Tanba, iha fulan ne’e, maka tempu bani-been atu ko’a/halo kolleita.

Ko’alia liután, S.E. Prezidente Repúblika husu katak, eventu ne’ebé refere bele hala’o hanesan festa kulturál kada tinan hodi bele promove no dada ema barak ba vizita komunidade Uma-Lisan Manu La Mea iha suku Cribas.
Molok atu hakotu nia lia-menon, Xefe Estadu mós hato’o tebes nia agradesimentu ba mídia hirak ne’ebé halo kobertura ba eventu refere, tanba bele ajuda halo promosaun mós ba fatin seluk hirak-ne’ebé maka iha poténsia bani-been hanesan iha suku Cribas.

Tuir tradisaun, antes atu halo kolleita/ko’a bani-been iha dadeer-saan wainhira rai sei nakukun, iha kalan antes, tenke hala’o uluk serimónia husu lisensa ba uma-lulik atu fó matak-malirin atu nune’e prosesu ko’a bani-been labele hetan azar ruma hanesan; bani tata ka duni.

Xefe Estadu no Ministru Turizmu partisipa diretamente iha serimónia matak-malirin nu’udar refere.

Iha kolleita tinan ida-ne’e, bani-been la iha ka la hetan rezultadu ne’ebé di’ak, tanba tempu ba kolleita liu ona, no loloos hala’o fulan-Abríl.