S.E. P.R. TAUR MATAN RUAK HALA’O DIÁLOGU HO KOMUNIDADE SUKU AILELO NO SAMARA

by Media Team Posted on

Samara-Hatolia, 26 Maiu 2015 – S.E. Prezidente Repúblika, Taur Matan Ruak, kontinua hala’o diálogu komunitáriu ba loron tolu nian ho komunidade suku Ailelo iha parte dadeer no iha parte lokraik ho komunidade suku Samára, postu administrativu Hatolia, munisípiu Ermera iha kuarta-feira ne’e.

Durante diálogu iha suku Ailelo no Samára, liuhosi sesaun perguntas, komunidade suku rua ne’e kuaze aprezenta problema hirak ne’ebé hanesan ba Xefe Estadu. Nu’udar ezemplu, suku rua ne’ebé refere seidauk iha asesu ba eletrisidade, bee la iha ba natar hirak ne’ebé boot iha suku ne’e.

Komunidade sira mós husu atu halo irrigasaun, monta médiku veterináriu iha suku atu atende preokupasaun hirak sobre saúde ba animal ne’ebé komunidade hakiak, liuliu karau ne’ebé mate beibeik tinatinan.

Hatán kona-ba problema hirak-ne’ebé komunidade sira levanta, Xefe Estadu hatete:

“Bee moos, estrada, eletrisidade, saúde ne’e tugas governu nian i tenke halo, se la halo iha ha’u-nia tempu entaun sei iha Prezidente sira seluk nia tempu. Se la’ós governu ida-ne’e, entaun governu tuirmai. Ita labele rezolve dala ida de’it, tenke ida ba ida. Se ita halai maka’as bele monu. Mas, se ita la’o neineik maibé beibeik ita sei to’o fatin ne’ebé ita hakarak.”

Xefe Estadu hatutan:

“Agora buat ne’ebé Prezidente Repúblika husu ba imi atu serbisu maka’as para hadi’ak imi-nia família, se iha karau ida hakiak tan karau ida, se iha ona ai-teka hun ida kuda tan ai teka hun ida, hodi aumenta rendimentu família nian.”

Kona-ba irrigasaun, Xefe Estadu hatán katak agrikultura sai problema boot iha fatifatin iha Timor-Leste laran tomak ne’ebé iha natar barak, irrigasaun la di’ak, inklui programa governu nian, “povu kuda governu sosa” la iha implementasaun no halo agrikultór sira preokupa. Maibé, Xefe Estadu hatutan, oras ne’e daudaun governu investe ona iha irrigasaun iha fatin balun atu hasa’e produsaun haree nian.

Xefe Estadu realsa liután katak, setór agrikultura no turizmu sai fatór auto-subsisténsia ba ekonomia Timor-Leste wainhira mina no gás maran, tanba ne’e presiza duni iha atensaun.

Iha suku Ailelo hafoin termina diálogu Xefe Estadu aproveita hala’o observasaun ba Eskola Báziku Filial iha suku ne’ebé refere atu kondisaun eskola ne’ebé didin de’it ho zinku/kaleen. No, sala laran rai tanan de’it ne’ebé bele prejudika estudantes sira-nia saúde.

Hakat fali ba suku Samára, antes hala’o diálogu Xefe Estadu inaugura uluk projetu kanalizasaun bee moos ba sede suku ne’ebé maka hala’o liuhosi projetu PNDS nian.