S.E. PR. TMR ATRIBUI ORDEN NICOLAU LOBATO BA SAUDOZU MINISTRU ESTADU KOORDENADÓR ASUNTUS SOSIAIS NO MINISTRU EDUKASAUN, FERNANDO LASAMA DE ARAUJO, BA TÍTULU PÓSTUMU

by Media Team Posted on 6 views

Dili, 8 Juñu 2015 – S.E. Prezidente Repúblika, Taur Matan Ruak, atribui Orden Nicolau Lobato ba saudozu Ministru Estadu Koordenadór Asuntus Sosiais no Ministru Edukasaun Fernando Lasama de Araujo nu’udar valorizasaun no rekoñesimentu Estadu nian ba saudozu nia dedikasaun durante funu ba libertasaun nasionál.

 Xefe Estadu atribui kondekorasaun nu’udar refere ba saudozu iha Uma-Fukun Parlamentu Nasionál iha sesta-feira semana kotuk. Iha okaziaun omenajen ikus husi Parlamentu Nasionál ba saudozu La Sama, antes lori ba Jardín Erois ba Pátria iha Metinaro, Dili, hanesan nia fatin ikusliu ba nia deskansa. Hafoin atribui tiha, medalla ne’ebé refere entrega fila ba saudozu nia oan-mane, Lirio Hadomi Aquino.

 Iha nia diskursu, Xefe Estadu hatete:

Kondekorasaun ho Orden Nicolau Lobato ba títulu póstumu, atu fó rekoñesimentu ba serbisu valiozu sira-ne’ebé saudozu halo ba Timor-Leste, espera admirasaun no respeitu nasaun tomak nian ba Fernando Lasama de Araújo, ne’ebé sei lembra ba nafatin ba jerasaun sira tuirmai hanesan ema di’ak no ita-nia rain nia ema boot ida.”

Xefe Estadu hatutan:

“Omenajen ne’ebé hato’o ba maun-alin Lasama ne’e sai nu’udar jestu Parlamentu no Nasaun nian atu fó onra ba memória Fernando Lasama de Araújo nian, ne’e katak, la’o tuir ninia ezemplu no ita kontinua hala’o serbisu ne’ebé nia dedika iha nia moris.”

Hafoin remata omenajen ikus iha Parlamentu Nasionál, iha tuku 14 OTL resin, kontinua lori tutan saudozu Lasama nia isin-mate ba Semitériu Jardín Erois ba Pátria nian iha Metinaru atu haloot nia isin-mate ba iha nia fatin deskansa ikus nian.

 Prezidente Repúblika ho Primeira Dama, titulares órgaun soberania hanesan Governu, Parlamentu no tribunais, korpu diplomátiku, espoza saudozu ho nia oan-mane, organizasaun estudantíl sira, militantes no simpatizantes Partidu PD no joven sira-ne’ebé simpatia ba saudozu partisipa iha serimónia fúnebre saudozu Ministru Estadu Koordenadór Asuntus Sosiais no Ministru Edukasaun ne’e.~~HOTU~~

Author

Media Team