PREZIDENSIA REPÚBLIKA ORGANIZA SEMINÁRIU KONA-BA INDÍSE PROBREZA MULTIDIMENSIONÁL

by Media Team Posted on 7 views

Dili, 12 Juñu 2015 – Prezidénsia Repúblika organiza seminariu loron ida kona-ba índise pobreza multidimensional Kuarta-feira ne’e iha Palásiu Prezidente. Seminariu refere loke hosi Xefe kaza Sivil Fidelis Magalhães, iha ne’ebé profesór na’in-tolu husi Universidade Monash, hanesan, Brett Inder, Katy Cornwall no Guarav Datt maka halo aprezentasaun maka ko’alia sobre métodu oinsá sukat moris-di’ak iha Timor-Leste.

 Iha ninia intervensaun, Xefe Casa Civil, Fidelis Magalhães, hato’o nia agradesimentu ba profesór sira-ne’e, tanba métodu índise pobreza multidimensionál (Multidimensional Poverty Index, MPI) ne’e importante tebes atu komprende situasaun no sukat pobreza iha Timor-Leste.

 Semináriu ne’e hanesan dalan ida atu ajuda S.E Prezidente Repúblika, Taur Matan Ruak, nia objetivu durante halo vizita ba suku sira, atu hadi’a povu nia moris-di’ak iha parte edukasaun, ekonomia, saúde no alimentasaun, estabilidade no unidade.

 Xefe Casa Civil salienta semináriu métodu MPI ne’e referénsia importante ba planu S.E. Prezidente Repúblika, Taur Matan Ruak, atu estabelese Sentru Observasaun Moris-Di’ak iha tempu besik.

 Objetivu atu harii Sentru Observasaun ne’e maka atu fasilita informasaun bazeia ba estudu ne’ebé kle’an ba governu, instituisaun hotu, sosiedade sivíl no estudante sira atu partisipa iha dezenvolvimentu nasionál.

 Haree filafali ba aprezentasaun ne’ebé profesór Brett Inder ne’ebé halo hodi reprezenta sira na’in-tolu nia papél, sira subliña pontu importante hirak hanesan “Sukat Kiak no Moris-Di’ak” no sira-nia papél ne’ebé maka aprezenta iha okaziaun úniku ida-ne’e bele sai hanesan matadalan ba dezenvolvimentu iha Timor-Leste.

 Hola parte iha semináriu ne’ebé refere, reprezentante Embaixada Austrália, PNDS, The Asia Foundation iha Timor-Leste, ONG Luta Hamutuk, estudantes hosi universidade IOB no UNDIL.~~~HOTU~~~

Author

Media Team