S.E. PREZIDENTE REPÚBLIKA TMR HALO ABERTURA FORUM DARUAK SOSIEDADE SIVÍL PAÍS CPLP NIAN

by Media Team Posted on

Dili, 13 Jullu 2015 – S.E. Prezidente Repúblika, Taur Matan Ruak, loke forum daruak ba Sosiedade Sivíl ba hosi nasaun hirak-ne’ebé ko’alia lia-portugés ka CPLP, ho tema “O valor económico da Identidade Comum da Sociedade Civil da CPLP” ne’ebé realiza iha segunda-feira ne’e to’o sesta-feira, iha Ministériu Negósiu Estranjeirus, Dili.

 Iha INTERVENSAUN , Xefe Estadu hatete partisipasaun sidadaun sira-nian esensiál para reforsa no dezenvolve sosiedade ida ne’ebé demokrátika iha aspetu hotu hanesan kulturál, sosiál no ekonómiku.

 “Tanba ne’e, ha’u iha laran ksolok boot katak ami-nia kapitál hetan oportunidade hodi halibur, no kontribui no dinamiza Forum Sosiedade Sivil CPLP nian ba Daruak no, ha’u rasik iha oportunidade atu ko’alia no hato’o benvindu ba imi pesoalmente.dehan Xefe Estadu iha nia diskursu.

Xefe Estadu hatutan:

Ami sei iha dalan barak atu la’o liu atu reforsa ezersísiu sidadania nian no korresponsabiliza sidadaun sira iha dezenvolvimentu nasaun nian. Ami-nia sosiedade sivil fó tiha ona ezemplu barak kona-ba kapasidae intervensaun no inisiativa.”

 Iha biban refere Xefe Estadu mós fahe informasaun kona-ba progresu dezenvolvimentu nasionál ne’ebé la’o daudaun no planu integrasaun ba forum rejionál no internasionál nian.

Molok atu taka nia diskursu, Xefe Estadu hatete:

“Ha’u laiha dúvida katak partisipasaun no kreatividade sidadaun sira-nian sei hetok sai realidade liután, ne’ebé fó forma ida ba CPLP—no nu’udar fonte ba nia kbiit.

Ha’u hakotu hodi hato’o ba Ita-Boot sira votu servisu di’ak ba Fórum ida-ne’e. Nu’udar ha’u-nia espetativa katak partisipasaun sidadaun sira-nian sai maka’as liután iha Ita-Boot sira-nia sorumutu ida-ne’e—ba ita-nia Komunidade nia benefísiu”

Hola parte iha forum refere, reprezentante sosiedade sivíl hirak hosi Timor-Leste nian rasik, Portugál, Angola, Brazíl, Kabuverde, Giné Ekuatoriál, Giné-Bisau, Mosambike, Saun Tomé no Prínsipe no Makau, Ministru Negósiu Estranjeiru, Hernani Coelho, Ministru Prezidénsia Konsellu-Ministru, Ágio Pereira, no konvidadu importante sira seluk.~~~HOTU~~~~