S.E. PREZIDENTE REPÚBLIKA, TAUR MATAN RUAK, VIZITA KUARTÉL PNTL LAUTEM

by Media Team Posted on

Lautem, 22 Jullu 2015 – S.E Prezidente Repúblika, Taur Matan Ruak, halo vizita traballu ida ba Kuartél-Jenerál PNTL hodi haree besik serbisu membru PNTL sira-nian no rona kona-ba planu serbisu no dezafiu sira-ne’ebé PNTL munisípiu hasoru, iha munisípiu Lautem, iha segunda-feira lokraik, iha Lospalos Villa.

Iha enkontru ne’ebé Komandante PNTL munisípiu Lautem, Superintendente Marcos Sequeira Nunes, maka loke ne’e, sira hatete no sente orgullu, iha onra tebes, tanba hetan vizita husi S.E. Prezidente Repúblika, Taur Matan Ruak. Ida-ne’e hanesan vizita ba dala uluk Xefe Estadu ka membru órgaun soberanu ida halo iha fatin refere.

Iha nia aprezentasaun relatóriu ba Xefe Estadu, Komandante munisípiu ne’e esplika ho detalle kona-ba situasaun ne’ebé sira enfrenta iha terrenu. Nu’udar ezemplu, transporte ne’ebé uitoan no la iha manutensaun ba karreta no motor hirak ne’ebé aat tiha ona difikulta sira-nia servisu patrulla ba suku sira no mós númeru asidente tráfiku ne’ebé aas.

Sira mós husu atu bele hetan apoiu ekipamentu hanesan fitness, sound system no farda foun, sapatu, stick no gás atu nune’e bele hala’o servisu di’ak liután.

Hafoin rona tiha preokupasoins hosi komandante munisípiu nian, iha nia lia-menon hato’o uluk apresiasaun boot ba evolusaun ka mudansa ne’ebé iha, liuliu kona-ba pás no estabilidade:

“Ita-nia nasaun iha evolusaun di’ak tebes durante tinan 13 kompara ho sira-ne’ebé ukun iha tinan barak nia laran, ne’ebé mós sei hasoru difikuldades. Atu hetan kondisaun no situasaun hanesan ita agora iha tempu badak ne’e, nasaun seluk difisil tebes tanba ita-nia nasaun ne’e mai husi nasaun konflitu maibé ohin iha situasaun ne’ebé hakmatek.”

Hafoin Xefe Estadu hatutan:

“Prezidente Repúblika husu ba PNTL Lautem atu servisu maka’as iha ekipa no servisu hamutuk ho komunidade sira liuhosi kria komunikasaun ida ne’ebé di’ak atu nune’e bele muda sira-nia hanoin no mentalidade hodi komunidade sira bele sente hetan independénsia, moris hakmatek, nune’e hametin konfiansa no pás iha nasaun ne’e.

Xefe Estadu mós louva ba estabelesimentu Ofisiál Polísia Suku, tanba bele redús númeru krime iha komunidade nia leet no husu ba PNTL munisípiu Lautem atu kontribui ba dezenvolvimentu liuhosi dezenvolve rekursu no moderniza infraestrutura iha munisípiu refere.

Adjuntu Xefe Casa Militar, Komandante PNTL munisípiu Lautem, Administradór Lautem, konvidadu especial Xefe Estadu nian hanesan Administradór postu Hatulia, Xefe-Suku Beremana (Turiscai) maka akompaña vizita ne’e.