S.E PREZIDENTE REPÚBLIKA, TMR, HALA’O DIÁLOGU HO KOMUNIDADE SUKU CAI-CUA NO VEMASSE VILLA

by Media Team Posted on

Vemasse, 29 Jullu 2015 – S.E Prezidente Repúblika, Taur Matan Ruak, iha tersa-feira ne’e hala’o diálogu komunitáriu ba loron dahituk nian ho komunidade iha suku Cai-Cua iha parte dadeer, no kontinua ho komunidade sira iha suku Vemasse Villa iha parte loraik, postu administrativu Vemasse, munisípiu Baucau.

Hanesan nia vizita ba fatifatin, iha suku Cai-Cua no Vemasse Villa, Xefe Estadu mós fó agradesimentu ba komunidade sira-nia kontribuisaun ba ukun-an, no kontinua husu ba komunidade sira tenke partisipa iha prosesu dezenvolvimentu atu hetan moris-di’ak.

Iha sesaun husu no hatán, iha suku Cai-Cua, Mestre Domingus Freitas, lamenta ho attitude estudante suku Cai-Cua ne’ebé halo violénsia kontra mestre.

Hatán ba problema ne’e Xefe Estadu dehan:

“Labarik baku mestre ne’e krime, tenke kesar ba polísia hodi halo keixa ba nia. Tanba, ita-nia lei iha para regula ida-ne’e. Eskola ne’e hanorin matenek de’it, liuliu atu hatene halo sasán, hanorin edukasaun morál no hanorin ema sai ema ne’ebé di’ak. Maibé, ha’u espera katak ita-nia oan sira iha ne’e labele baku mestre, inan no aman, tanba demokrasia iha regras.”

Hatán ba preokupasaun husi Nazario da Silva sobre kultura suku ne’ebé hamate ekonomia komunidade, Xefe Estadu hatete:

“Ha’u konkorda ho oan nia hanoin redús kultura, tenke iha limitasaun no ita-nia oan sira maka tenke númeru um. Tanba, labarik sira maka hatutan ita-nia kultura, nune’e tenke tau matan ba sira.”

 Hatán kona-ba problema faluk na’in-tolu ne’ebé la iha uma no kbiit atu sustenta moris, Xefe Estadu hatete:

Ami sei haree saida maka ami bele ajuda, no ha’u sei entrega ba ha’u-nia asesór polítiku Filipe da Costa ho Primeira Dama Isabel Ferreira atu haree kona-ba ida-ne’e. Mas, ha’u husu ba amu-liurai Xefe-Suku no komunidade sira mós tenke hamutuk buka solusaun tau matan ba ita-nia inan sira.”

Wainhira hakat fali mai Vemasse Villa, liuhosi sesaun husu no hatán, veterana Maria Bui–mesak   hato’o nia preokupasaun hodi dehan katak, iha suku Vemasse Villa komunidade ho lider komunitária la fahe malu maibé la fiar malu. Tanba, ne’e atividade iha suku laran, komunidade sira ladún partisipa.

Hatán ba ida-ne’e Xefe Estadu hatete:

“Ha’u husu ba imi, tenke ko’alia ba malu, ne’e importante. Imi iha suku ne’e hanesan família ida, nune’e imi tenke pasiénsia, haraik an ba malu oinsá rezolve imi-nia problema.”

Kona-ba problema seluk hirak-ne’ebé komunidade sira levanta, hanesan, problema irrigasaun, bee moos iha aldeia balu seidauk iha, tratór halai natar família nian de’it, kondisaun eskola ladi’ak, Xefe Estadu fó oportunidade ba Xefe Departamentu no administradór munisípiu atu fó resposta ba komunidade nia preokupasoins hirak-ne’ebé hato’o ona.

Ministru Negósius Estranjeirus Dr. Hernani Coelho ne’ebé marka mós prezensa diálogu iha suku Vemasse Villa fahe mós hanoin ba komunidade sira sobre serbisu Ministériu Negósius Estranjeirus nian atu komunidade mós bele komprende.

 Tuir agenda diálogu tuirmai sei hala’o iha Suku Maabat no Aiteas, postu administrativu Manatutu Villa, munisípiu Manatutu.HOTU