S.E. PREZIDENTE REPÚBLIKA, TMR, HALA’O DIÁLOGU KOMUNITÁRIU HO KOMUNIDADE SUKU COM

by Media Team Posted on

Lautem, 26 Jullu 2015 – S.E. Prezidente Repúblika Taur Matan Ruak, ne’ebé maka akompañadu hosi Primeira Dama, Isabel Ferreira, hala’o diálogu komunitáriu ba loron dalimak iha suku Com, postu administrativu Lautem, munisípiu Lautem, iha domingu, fim-de-semana ne’e.

Iha diálogu suku Com, aleinde Xefe Estadu fahe vizaun no hanoin kona-ba progresu no dezafius Timor-Leste nian hafoin Ukun-An to’o ohin loron, Xefe Estadu mós motiva komunidade sira kona-ba oinsá atu serbisu hamutuk. Xefe Estadu mós husu ba komunidade suku Com atu sulan fahi tanba Com hanesan fatin turístiku, maibé haree rasik ho matan katak komunidade husik livre fahi nafatin.

“Ha’u horisehik mai [sábadu ] mai haree turista ain haat iha tasi ibun [fahi]. Ha’u-nia oan sira horisehik atu hariis mas sira ta’uk tanba fahi la’o bá-mai iha tasi-ibun”, dehan Xefe Estadu ba komunidade Com.

Nia hatutan:

“Ha’u gosta imi Com, fatin furak. Mas, se bele, sulan tiha fahi, tanba ha’u lakohi ema bá ko’alia aat imi, ne’e ha’u mós moe.”

Tuir Xefe Estadu katak problema ida tan iha Timór maka kona-ba saneamentu:

“Ha’u ko’alia ho malae sira-ne’ebé vizita ita-nia rain, sira dehan Prezidente imi-nia rain kapás, furak. Mas, ami ta’uk maka ho imi-nia sentina.”

Ho ida-ne’e, Xefe Estadu hatete katak, Turizmu tenke tau atensaun. Tanba turista sira ne’ebé hakarak atu vizita fatin turístiku tenke iha kondisaun moos no ijiéniku.

Nune’e, wainhira tama ba sesaun husu no hatán iha suku ne’ebé refere, komunidade ladún husu kona-ba bee moos, eletrisidade no estrada, tanba iha ona kondisaun. Entaun, asuntu ne’ebé sai sira-nia preokupasaun liuliu maka sobre, pensaun ba veteranus sira ne’ebé la tuir grau partisipasaun funu. Husu mós atu loke basar entre suku Com ho illa Kisar (Maluku-Indonesia). Hato’o mós sobre NGO hirak balun ne’ebé harii tiha eskola pois abandona, ró ilegál tama halo peska ilegál iha tasi Com, portu Com kondisaun la favorese ró atu para iha ne’ebá, ho problema real seluk hirak.

 Hatán ba problema veteranus nia, Xefe Estadu hatete:

“Lei la’ós bíblia. Lei ne’e ita maka halo atu ajuda regula no rezolve problema. Mas, lei ne’ebé iha para aumenta problema hapus tiha, halo fali foun.”

Hatán kona-ba NGO loke tiha eskola mais ikusmai abandona tiha Xefe Estadu hatán:

“Primeira vés ha’u mai Lospalos rona ida-ne’e, sira (ONG) husik hela pois soe fali todan ba governu. Governu maka tenke lori todan, sira kuandu loke la mai husu governu, problema ona maka sira husik ba imi bá husu governu. Sira loloos ne’e fó han ikan. Sira-ne’e dehan loloos buka projetu, komu projetu ne’e sustentabilidade la iha, depois tau sala ba governu.”

Tuir ajenda diálogu tuirmai iha suku Daudere, Eukisi no Ililai, postu administrativu Lautem.HOTU