S.E. PREZIDENTE REPÚBLIKA, TMR, HALA’O DIÁLOGU KOMUNITÁRIU HO KOMUNIDADE SUKU DAUDERE NO ILILAI -EUKISI

by Media Team Posted on

Lautem, 28 Jullu 2015 – S.E Prezidente Repúblika, Taur Matan Ruak, segunda-feira ne’e hala’o diálogu komunitáriu ba loron neen ho komunidade iha suku Daudere iha parte dadeer, no iha parte loraik kontinua ho komunidade sira iha suku Ililai no Eukisi iha Posu Antigu Laivai, postu administrativu Lautem, munisípiu Lautem.

 Iha suku Dadudere, Xefe Estadu fó parabéns no sente haksolok ho relatóriu ne’ebé Xefe Suku hato’o tanba hatudu númeru funsionáriu públiku ne’ebé aas. Hafoin, suku ne’ebé refere mós livre husi analfabetizmu, tanba labarik no juventude sira hotu iha asesu ba edukasaun husi nivel primária to’o universidade.

 Xefe Estadu espera atu komunidade suku Daudere kontinua nafatin investe ba edukasaun hodi esklarese katak:

“Ita hakarak iha tinan 2030, ita atinje ona rendimentu [ekonomia] médiu. Tanba, país sira iha rendimentu médiu la simu ona ajuda husi nasaun seluk, ezemplu, Cabo Verde, nune’e ita tenke investe iha edukasaun hodi dezenvolve ita-nia nasaun.”

 Prezidente Repúblika mós husu ba komunidade sira atu labele ajuda subar Mauk Moruk. Maibé atu servisu hamutuk ho Estadu atu bele rezolve problema ne’e hotu lalais iha tempu badak nia laran. Selae, dala barak populasaun mak sai vítima ba problema ne’e.

 Iha sesaun perguntas, Rafael Pinto husu ba Xefe Estadu atu fó ajuda ai-teka Filipina ba komunidade sira kuda. Tanba, iha suku ne’ebé refere rai sempre monu, nune’e presiza atu kuda ai-hun boot atu bele kaer metin rai.

 Hatán ba preokupasaun ne’e, Xefe Estadu hatete:

“Ha’u hakarak fó agradesimentu ba ha’u-nia aman, tanba iha suku barabarak ha’u bá vizita la barak maka husu ai-oan para kuda. Ha’u sei fó ba Diretór MAP munisípiu Lautem hodi konfirma iha ne’e iha ai-oan ka lae. Mas, se kuandu la iha imi bele mantein kontaktu ho ha’u-nia asesór asuntu polítiku, Filipe da Costa, ne’ebé servisu di’ak ho Ministériu Agrikultura iha Dili no dala ruma sira tula ai-oan ba fó sidadaun sira ne’ebé hakarak kuda, no ami halo akompañamentu.”

 Iha suku Ililai no Eukisi, Xefe Estadu kontinua fahe informasaun sobre progresu no dezafius husi harii nasaun no motiva komunidade sira iha suku rua ne’ebé refere atu serbisu hamutuk ba futuru nasaun nian ne’ebé maka iha prosperidade ba komunidade hotu.

 Iha sesaun husu no hatán, Xefe Suku no komunidade suku rua refere, aprezenta kestoins lubuk ida ba Xefe Estadu, nu’udar ezemplu:

  • sujere atu Laivai sai fali postu administrativu, tanba iha tempu koloniál portugés, Laivai maka postu administrativu;

  • irrigasaun aat tinan 8 ona no halo natar ektares lubuk ida abandonadu, maski iha kompañia ida mai 2006 hadi’ak ona mas la halo hotu no abandona tiha;

  • kanalizasaun bee moos iha aldeia foho leten la iha;

  • sala eskola EBF la sufisiente;

  • programa fila rai gratuita hosi MAP sempre tarde, tanba udan ona mak fila rai;

  • problema veteranus hanesan pensaun la tuir dedikasaun eskluziva iha ai-laran,

  • hadi’ak sede postu antigu Laivai, no problema reál sira seluk.

 Hatán ba kona-ba sujestaun Xefe Suku Ililai atu Laivai bele sai hanesan postu administrativu foun, Xefe Estadu hatán:

“Iha fatin-fatin levanta, mas ida-ne’e depende ba Ministériu Administrasaun Estatál. Mas, ha’u nia konsellu maka ida-ne’e: ita haree lai problema sira ne’ebé iha, karik iha posibilidade aban-bainrua Ministériu Estatál maka haree no estuda ho autoridades munisípiu bele ka lae harii postu foun.”

 Ko’alia sobre problema irrigasaun, Xefe Estadu hatán mós katak:

“Irrigasaun orasida ha’u fó ba Xefe Departamentu Agrikultura Lautem. Mas, ha’u mós hakarak atu hatete, daudaun ne’e governu halo irrigasaun modernu iha fatin haat, porezemplu, irrigasaun Likidiga (Baguia) nian kustu $5,9 milloins, iha Zumalai $12 milloins.”

 Hafoin, Xefe Estadu hatutan:

“Komu ita halo ki’ikoan, kualidade la iha, bee mai sobu. Entaun, governu hanoin halo boot. Ita labele halo dala ida de’it, mas neineik ita bele halo para dezenvolve ita-nia agrikultura. Tanba, agrikultura maka fó serbisu barak. Se, ita la dezenvolve, ne’e problema boot. Tanba, nia hanesan setór ida determina kontribui ba dezenvolvimentu Timór nian, entaun ita tenke investe maka’as.”

 Kona-ba problema sira seluk, Xefe Estadu fó oportunidade ba xefe departamentu munisípiu no administradór atu hatán no iha tempu hanesan esplika ba komunidade planu munisípiu nian ba problema hirak ne’ebé refere.

 Tuir ajenda diálogu ba loron hitu nian iha suku Caicua no Vemasse Villa, postu administrativu Vemasse, munisípiu Baucau. HOTU