S.E. PREZIDENTE REPÚBLIKA TMR IHA DIÁLOGU KOMUNITÁRIU HO KOMUNIDADE SUKU BADURO NO MAINA II

by Media Team Posted on

Lautem, 25 Jullu 2015 – S.E Prezidente Repúblika, Taur Matan Ruak, hala’o diálogu komunitáriu ba loron toluk nian ho komunidade iha suku Baduro iha parte dadeer, no kontinua ho komunidade sira iha suku Maina II iha parte loraik, iha postu administrativu Lautem, munisípiu Lautem, iha sesta-feira ne’e semana kotuk.

Iha diálogu komunitáriu iha suku rua ne’ebé refere, Xefe Estadu kontinua hato’o nia hanoin no vizaun ba komunidade sira kona-ba objetivu husi vizita suku ida ba suku seluk ne’e atu bele hato’o nia agradesimentu ba komunidade ba sira-nia partisipasaun iha funu atu lori nasaun, Timor-Leste, hetan nia independénsia.

Hafoin ida-ne’e, S.E Prezidente Repúblika mós husu ba komunidade sira atu tau matan ba asuntu importante haat hanesan tuirmai:

  • Komunidade sira tenke tau matan ba sira-nia ekonomia família nian,
  • Komunidade sira atu tenke investe ba oan sira-nia eskola,
  • Komunidade sira mós atu kuidadu família nia saúde, no
  • Komunidade sira tenke servisu hamutuk atu dezenvolve sira-nia aldeia no suku laran.

 

Bainhira tama ba sesaun husu no hatán, komunidade suku Baduro maioria hato’o sira-nia preokupasaun sobre estrada ne’ebé aat no afeta tebes sira-nia movimentu no negósiu ba vila.

Hatán ba preokupasaun ne’e, Xefe Estadu dehan:

Kada tinan governu iha orsamentu ba infraestrutura, inklui estrada, tanba estrada barak iha Timór presiza hadi’ak. Maibé, ita tenke fó prioridade hodi hadi’ak estrada ne’ebé maka aat liu no fó risku ba ema kuandu halo movimentu. Governu sei hadi’ak imi-nian maibé neineik no ida-idak.”

Xefe Estadu mós hatutan:

“Ami ba vizita suku Bermana, iha Turiskai, ami tenke la’o loron rua no toba dalan kalan ida mak foin to’o fatin. Ohin, ha’u mai vizita imi, karreta para iha uma oin kedas, ne’e hatudu katak imi-nia estrada di’ak liu kompara ho komunidade sira iha munisípiu seluk.”

 Kona-ba preokupasoins komunidade suku Baduro ne’ebé ezije atu rezolve lailais problema Mauk Moruk, Xefe Estadu deklara katak, Estadu no governu tenta para rezolve, tanba sira hakarak povu moris hakmatek no labele terus tan, no hein iha fulan-Agostu bele hasoru Mauk Moruk hodi tuur hamutuk atu rezolve problema ne’e.

Entretantu iha suku Maina II (Laikara) Xefe Estadu kontente tanba iha suku Maina II povu unidade no povu badinas hadi’ak sira-nia ekonomia:

“Parabéns ba imi Maina II, imi fiar an i fiar iha futuru, ha’u kontente. (Iha) 2011, ha’u mai tinan 3 liutiha, ha’u mai fali imi-nia uma iha mudansa imi uma baki barak ona, imi badinas ha’u hakarak ita avansa nafatin”.

Iha sesaun husu no hatán komunidade suku ne’ebé refere barakliu levanta kona-ba problema bee moos. Tanba, iha suku ne’e bee moos la iha no husu Xefe Estadu atu tau atensaun urjentemente. Hafoin, postu saúde la iha, produtu lokál hanesan nuu estraga de’it tanba estrada aat, projetu laiha kualidade, problema Mauk Moruk ho nia grupu, no mós problema reál seluk hirak. Nune’e, Governu presiza buka alternativa seluk ba taxa doméstika tanba mina-rai loron ida sei maran.

Hatán kona-ba problema bee moos, Xefe Estadu hatete:

“Problema bee akontese iha fatin-fatin, kona-ba imi-nia bee (moos), ha’u sei haruka ha’u-nia asesór bá ko’alia ho embaixada Japaun para buka hatene tanba sá mak sira mai haree ona maibé seidauk realiza.”

Wainhira hatán kona-ba reseita mina-rai nian, Xefe Estadu hatete:

Ita laiha dalan seluk, tenke buka alternativa aleinde mina, selae ita sei mate hanesan povu no hanesan nasaun. Piór liu agora mina folin tun. Tanba-ne’e ita tenke hatene poupa.”

Tuir agenda diálogu ba loron dahaat nian iha suku Serelau, postu administrativu Lautem, munisípiu Lautem.HOTU