S.E PREZIDENTE REPÚBLIKA TMR IHA DIÁLOGU KOMUNITÁRIU HO KOMUNIDADE SUKU RASA NO MAINA I

by Media Team Posted on

Lautem, 23 Jullu 2015 – S.E Prezidente Repúblika, Taur Matan Ruak, kontinua filafali série diálogu komunitáriu hosi suku ba suku ne’ebé planeadu ona, no hala’o loron uluk nian iha komunidade sira iha suku Rasa iha parte dadeer, no iha parte lokraik kontinua ho komunidade iha suku Maina I, postu administrativu Lospalos, munisípiu Lautem, iha kuarta-feira semana kotuk.

 Iha suku Rasa, Xefe Estadu sente kontente haree komunidade sira ne’ebé agora bele asesu ona ba bee moos no mós eletrisidade ne’ebé kobre komunidade kuaze 100% wainhira kompara fali ho suku balun ne’ebé Xefe Estadu vizita ona ne’ebé seidauk iha eletrisidade no bee moos.

 Iha sesaun pergunta, komunidade sira levanta kestoins barak ne’ebé liga ba sira-nia nesesidade moris, nu’udar ezemplu, mestre Rogerio ne’ebé hala’o vida hanesan agrikultór no lamenta ho produsaun agrikultura ne’ebé menus tanba laho estraga hotu.

 Xefe Estadu husu ba komunidade sira atu labele tesi ai arbiru tanba ne’e afeta ba mudansa klima i husu ba autoridade suku sira atu koordena ho munisípiu atu bele buka apoiu ruma wainhira presiza duni atu hatán ba problema ne’ebé refere.

 Entretantu hatán ba preokupasaun komunidade sira kona-ba númeru dezempregu ne’ebé aumenta aas husi tinan ba tinan, Xefe Estadu hatete:

“Kreximentu númeru jovens aumenta no serbisu menus, ne’e problema jestaun ne’ebé ita presiza hadi’ak. Importante maka ita-nia oan sira tenke aprende halo sasán, nune’e bele sai ema ne’ebé inovativu no bele kontribui ba dezenvolvimentu nasaun nian”, dehan Xefe Estadu.

Xefe Estadu hatutan problema boot ne’ebé Timór-oan barak depende ba servisu hosi governu, hotu-hotu hakarak sai funsionáriu públiku hotu.

 Wainhira hakat ba diálogu komunitáriu parte lokraik iha suku Maina I, Xefe Suku Américo Fernandes aprezenta problema suku nian ba Xefe Estadu hanesan: iha natar hamutuk ektares 210 ne’ebé abandonadu, tanba la iha irrigasaun; aldeia haat ne’ebé dook hosi estrada boot; ligasaun ba Lospalos Villa nia kondisaun estrada ladi’ak; no halo difisil ba povu atu lori sira-nia produtus ba merkadu. Hafoin, eletrisidade seidauk kobre iha aldeia haat refere.

 Hatán ba preokupasoins Xefe Suku nian ne’e, Xefe Estadu enkoraja komunidade Maina I nian atu labele lakon esperansa tanba difikuldades ne’ebé aprezenta Estadu sei buka tau matan maski sei presiza tempu naruk, tanba Estadu haree ba nasaun tomak no iha kometimentu tau matan hotu ba problema refere.

Aleinde preokupasoins refere, problema seluk ne’ebé komunidade Rasa no Maina I levanta maka hanesan problema veteranus, idozus, problema edukasaun hanesan falta sala aulas no kondisaun aulas ladi’ak, problema agrikultura, la iha irrigasaun no fila rai gratuita tarde, problema terra no propriedades, hanesan, lei ba rai no problema reál sira seluk.

 Wainhira hatán ba preokupasaun hirak ne’ebé liga ba serbisu governu nian, Xefe Estadu fó tempu ba Diretór Setorais munisípiu nian atu hatán ba komunidade sira-nia kestoins.
Primeira Dama, Sra. Isabel Ferreira, bainaka Xefe Estadu nian hanesan Administradór postu Hatulia (Ermera) no Xefe Suku Bermana (Turiskai-Manufahi) mós hola parte iha diálogu komunitáriu ba oportunidade ida-ne’e.

 Tuir ajenda ne’ebé iha, diálogu ba loron daruak nian hala’o iha suku Pairara no Parlamentu, munisípiu Lautem.HOTU