S.E. Prezidente Repúblika iha Suku Matata no Suku Fatuqueru

by Media Team Posted on

Ermera, 11 Agostu 2015- S.E. Prezidente Repúblika, Taur Matan Ruak, tersa-feira ne’e hala’o diálogu ho komunidade iha suku Matata no suku Fatuqueru, postu administrativu Railaco, munisípiu Ermera.

 Iha suku Matata, Xefe Estadu lamenta ho desfexu trájiku husi problema Grupu Konsellu Revolusionáriu Maubere (KRM) ne’ebé rezulta ema mate no kanek.

“Hanesan aman nasaun, ha’u husu deskulpa ba família sira ne’ebé lakon sira-nia família iha kazu ne’e. Prezidente Repúblika halo esforsu tomak atu evita fakar raan iha ita-nia rain. Ita husu boot ba Maromak no matebian sira, katak ida-ne’e, ikus ona ba”, dehan Xefe Estadu.

 Iha sesaun husu no hatán, bainhira hatán preokupasaun komunidade sira nian atu Estadu bele regula presu kafé ne’ebé tun-sa’e, Xefe Estadu hatán, la’ós Governu mas merkadu mak sei determina folin kafé nian.

Tan ne’e Xefe Estadu enkoraja agrikultór kafé-na’in sira atu la preokupa no kontinua kuda nafatin kafé.

 “Ha’u lamenta mas ita lalika preokupa. Ita iha kualidade kafé ne’ebé bele kompete ho produsaun kafé husi nasaun seluk. Kafé nia presu ne’e akompaña dezenvolvimentu nasaun nian. Ita mak tenke pasiénsia no labele lakon esperansa. Haree ba oin, la’ós haree de’it ba ohin”, subliña Xefe Estadu.

 Iha diálogu ho komunidade Fatuqueru, komunidade sira husu atu Estadu bele halo lailais Lei Rai nian no husu atu Xefe Estadu la promulga lei refere, se lei ne’e la defende interese ema barak nian, liuliu povu ki’ik sira.

 Hatán ba kestaun ne’e Xefe Estadu rekoñese katak, to’o oras ne’e Lei Rai, Parlamentu Nasionál seidauk halo hotu. Lei Rai tuir Xefe Estadu hanesan problema ida boot mós, iha Timor-Leste. Tan ne’e presiza tempu no pasiénsia atu rezolve problema sira hanesan rai.

Iha suku Fatuqueru, Xefe Estadu mós elojia inisiativa komunidade sira-nian, atu harii grupu indústria ki’ik, hanesan iha karpintaria, soru tais no ortikultura.

Ba grupu sira-ne’ebé iha oportunidade ne’e husu apoiu Xefe Estadu nian, atu fornese ekipamentus ne’ebé sira presiza, Xefe Estadu hatete:

 “Ami la promete atu fó buat hotu ne’ebé imi husu, tanba ita barak. Maibé ha’u sei husu Adjuntu Xefe Kaza Sivíl no ha’u-nia asesór, atu hamutuk ho imi, buka dalan, atu oinsá imi bele hetan saida mak imi presiza. Mas ida-ne’e la signifika hakat liu fali diretór sira-ne’ebé servisu iha ne’e. Mas ami fahe informasaun ba malu.”