S.E. PR TAUR MATAN RUAK PARTISIPA IHA SERIMÓNIA HALOOT RESTUS MORTAIS SAUDOZU ANTONIO FREITAS (RIA)

by Media Team Posted on

Lakuliu-Quelicai, 24 Agostu, 2015 – S.E. Prezidente Repúblika, Taur Matan Ruak, ne’ebé Primeira Dama akompaña, partisipa iha serimónia haloot restus mortais, Antonio Freitas (Ria), iha suku Lakuliu, iha domingu semana kotuk iha postu administrativu Quelicai, munisípiu Baucau.

Iha nia mensajen, Xefe Estadu husu ba família saudozu no komunidade atu banati tuir ezemplu saudozu sira-ne’ebé fó kontribuisaun ba nasaun nia Ukun-An liuhusi dezenvolvimentu no buka moris-di’ak. Hafoin, Xefe Estadu mós fó parabens no hato’o nia agradesimentu ba komisaun organizadora hodi fó fatin mahon ba saudozu Antonio Freitas.

Iha nia deklarasaun, Xefe Estadu hatete:

“Ria kontente, tanba nia mate la saugati, tanba Ukun-An ne’ebé nia buka depois nia mate tinan rua ita hetan independénsia. Maibé, Ria no sira seluk nia mate rai hela todan ida ba ita, la’ós de’it buka Ukun-An maibé buka moris-di’ak. Para hetan moris-di’ak, ita tenke servisu hamutuk no ha’u fiar ita sei hetan.”

Prezidente Komisaun Organizadora, Mario dos Santos, hato’o nia agradesimentu ba S.E. Prezidente Repúblika nia apoiu no prezensa hodi rekoñese ba saudozu nia luta ba independénsia no halo família la sente mesak.

Saudozu Antonio Freitas hanesan oan mane ba dala tolu husi maun-alin hamutuk lima. Saudozu Ria mate ho idade 25 iha tinan 1997 iha suku Wadaburo, postu administrativu Quelicai, munisípiu Baucau. Wainhira halo klandestina hasoru militár Indonézia, hafoin oho tiha saudozu, militár sira soe saudozu nia isin ba rai-kuak no hodi fatuk hanehan, prosesu buka restu mortais ne’e rasik to’o tinan neen maka foin hetan.