S.E. PREZIDENTE REPÚBLIKA TMR KONDEKORA EIS KOMANDANTE EM CHEFE DAS FALINTIL KAY RALA XANANA GUSMÃO HO ORDEN GERRILLA

by Media Team Posted on

Dili, 21 Agostu 2015 – S.E. Prezidente Repúblika, Taur Matan Ruak, atraves komemorasaun loron aniversáriu FALINTIL nian ba dala 40 ne’ebé maka hala’o iha Tasi Tolu, iha kinta-feira ne’e, kondekora eis-Komandante em Chefe das FALINTIL, atuál Ministru Planeamentu no Investimentu Estratéjiku, Kay Rala Xanana Gusmão, ho Orden Gerrilla.

Orden ne’ebé refere atribui tuir dekretu-lei nr. 53/2015, 8 Jullu, 2015, nu’udar rekoñesimentu aas liu Estadu Timor–Leste nian ba dedikasaun, Sr. Kay Rala Xanana Gusmão, hanesan lider gerrilleirus FALINTIL nian durante luta kontra okupasaun. Baze legál kriasaun Orden Onorífika Gerrilla maka artigu 29 lei nr. 3/2006, 12 Abríl, ne’ebé alterada ba lei nr. 09/2009, 29 Jullu, no ba lei nr. 02/2011, 23 Marsu.

Iha diskursu ba nasaun Xefe Estadu hato’o:

“Ha’u hato’o hako’ak boot no kmanek ida ba ha’u-nia maun Xanana Gusmão, ne’ebé troka Nicolau Lobato no orienta FALINTIL ho susesu no mós Rezisténsia tomak to’o povu nia vitória.”

Iha diskursu ba nasaun Xefe Estadu subliña:

“Hosi nia ezemplu, iha momentu sira-ne’ebé importante iha ita-nia istória, no hosi kapasidade lideransa, Xanana Gusmão sai nu’udar aman fundadór ida ne’ebé loloos ba Timor-Leste. Ninia vizaun, molok no hafoin tiha independénsia harii iha baze polítika rekonsiliasaun, pás no estabilidade ne’ebé ita-nia rain no ita-nia povu adota no implementa ho determinasaun boot no ho fuan nakloke.”

Iha serimónia ne’ebé refere, hala’o mós reforma ba F-FDTL efetivus na’in-26, tanba kestaun idade. Mas, sira mós hala’o funsaun hanesan eis-gerrilleiru FALINTIL ne’ebé luta durante tinan 24 iha ai-laran hasoru okupasaun.

Hala’o mós entrega kilat hosi jerasaun tuan ba jerasaun foun nu’udar jestu entrega responsabilidade hosi jerasaun tuan ba jerasaun foun atu kontinua defende Timor-Leste nia soberania.

Hola parte iha komemorasaun aniversáriu FALINTIL ba dala 40 ne’e mak hanesan, Vise Xefe Estadu Maiór Forsa Defeza Austrália (ADF), reprezentante Veteranus hosi Australia, Giné-Bisau, Sudaun Súl, veteranus hosi munisípiu 12 no Rejiaun Espesiál Oekusi no komunidade kapitál Dili.