S.E. PR TMR VIZITA NIA SUBAR-FATIN IHA MANATUTO

by Media Team Posted on

Dili, 25 Agostu, 2015 – S.E. Prezidente Repúblika, Taur Matan Ruak, hamutuk ho nia kaben, Sra. Isabel Ferreira, aproveita oportunidade hodi haree nia subar-fatin iha rai naran Lamsana no Balac área postu administrativu munisípiu Manatuto Vila, munisípiu Manatuto, hafoin fila mai Dili hosi vizita traballu ba munisípiu Viqueque no Baucau, iha Domingu semana kotuk.

Xefe Estadu subar iha fatin ne’ebé refere ba wainhira sei asume pasta hanesan Sub-Xefe Estadu Maiór FALINTIL iha tinan 1991 nia laran.

Hafoin haree liu tiha subar-fatin, Xefe Estadu konta tuir nia istória oinsá mai subar iha fatin rua ne’ebé refere, no aproveita agradese tebes ba responsavel kaixa klandestina, sr. Maubere ho nia ema hirak ne’ebé maka envolve an hodi subar atuál Xefe Estadu ho seguru embora nakonu ho forsa seguransa Indonézia nian iha tempu ne’ebá.

Iha nia mensajen ba kaixa klandestina ne’ebé uluk subar nia, Xefe Estadu hatete:

“Hanoin esperiénsia pasadu nian hodi relembra momentu ne’ebá saida maka halo ita barani halo buat hirak ne’e iha difisil no susar nia laran.”

Komandante ikusliu FALINTIL nian ne’e mós hatutan, pasadu labele hela hanesan istória. Maibé, buka atu halo oinsá para pasadu sai hanesan bee matan ida atu buka no sai alternativa hirak dezafius ne’ebé atualmente Timór-oan sira hasoru. Ida-ne’e bele tatoli mensajen ida katak, esperiénsia hirak-ne’ebé bele refere sai hanesan lisaun atu la’o ba oin ba buka moris-di’ak.

Xefe Estadu fó korajen ba eis klandestina sira atu kontinua kaer metin espíritu serbisu ne’ebé uluk hatudu ona iha tempu difisil atu kontinua ba oin, hanesan oinsá atu kolabora serbisu hirak hanesan halo to’os no natar hodi bele hadi’ak ekonomia família.

“Kuandu, ha’u iha ai-laran, ha’u gosta liu maka liis-mean boot, ne’e so uluk imi Manatuto maka iha, fatin seluk la iha. Entaun, kuandu ha’u-nia estafeta sira tun mai, ha’u hameno atu lori liis-mean ba ha’u. Agora Ukun-An tiha buat sira-ne’e laiha ona. Imi-nia liis-mean boot ne’ebé uluk ha’u gosta ne’e agora ita nein haree. Uluk tempu difisil imi hakarak serbisu, tanba sá mak Ukun-An ona imi lakohi serbisu fali, ne’e labele”, Xefe Estadu husu hodi halo apelu mós atu fó korajen.
Hafoin fahe tiha mensajen ba eis kaixa klandestina sira, Xefe Estadu ho nia komitiva kontinua mai kapitál Dili, i antes to’o Dili, aproveita mós minutu balu hodi presta omenajen ba saudozu sira-nia rate hanesan Ular, Lasama no Deputadu Folaran iha Jardim dos Heróis da Pátria. Metinaro