S.E. PREZIDENTE REPÚBLIKA, TMR, ASINA PLAKA BA SAUDOZU RAUL DA CRUZ TILMAN IHA SUKU MULO

by Media Team Posted on

Ainaro, 18 Outubru 2015 – S.E. Prezidente Repúblika, Taur Matan Ruak, iha Domingu, asina plaka no tau ai-funan ba saudozu Sr. Raul da Cruz Tilman, alias ‘Tigri Cablaki’, nia rate iha suku Mulo, postu administrativu Hatubeliko, munisípiu Ainaro.

 Iha nia mensajen ba komunidade suku Mulo, Xefe Estadu konta ba komunidade sira katak, saudozu Sr. Tigri Cablaki, ema ida ne’ebé importante iha istória luta ba independénsia, tanba, iha tinan 1984, Xefe Estadu ne’ebé maka iha momentu ne’ebá hanesan Komandante Falintil haruka saudozu atu hala’o serbisu importante ida, atu prepara kondisaun balun atu haruka filafali Falintil sira mai fali iha parte rejiaun Cablaki nian.

 Aprezenta mós razaun ba komunidade sira katak, rejiaun parte Cablaki nian maka hanesan parte importante ida iha Timor-Leste nia luta ba independénsia.

 Membru komunidade balun ne’ebé maka lee saudozu Tigri Cablaki nia biografia refere mós katak, antes ikusmai tama hamutuk atu hala’o serbisu importante balun iha rede rezisténsia nian, saudozu ne’e hala’o mós serbisu importante oioin.

 Xefe Estadu aproveita oportunidade ne’e atu hodi nia an rasik hanesan Prezidente Repúblika no mós hodi povu nia naran, hakarak atu hato’o apresiasaun sinsera ba família saudozu nian, tanba família saudozu nian lakon ona pesoál ida ne’ebé maka imposivel atu troka.

 Xefe Estadu esplika mós ba komunidade suku Mulo katak, Sr. Cablaki através nia kontribuisaun hamutuk ho komunidade sira seluk realiza ona Timor-Leste nia mehi hetan Ukun-Rasik An. Maibé,

fó hanoin ba komunidade ho autoridade lokál sira-ne’ebé maka marka prezensa katak, saudozu Sr. Cablaki mós husik hela mai Timoroan tomak serbisu ka mehi barak ne’ebé ladauk realiza.

Nune’e, husu ba komunidade sira atu organiza an no serbisu hamutuk atu labele husik istória sobre kontribuisaun ba independénsia lakon leet de’it, mas liuliu maka serbisu maka’as atu hetan “Moris Di’ak”.

 Hato’o mós iha nia mensajen ba komunidade katak, munisípiu Ainaro no Same maka sai munisípiu rua ne’ebé furak tebes wainhira ko’alia sobre organiza an. Maibé, husu ba komunidade sira atu kontinua nafatin serbisu maka’as ne’ebé uluk hala’o ona.

 Xefe Estadu mós fó korajen ba komunidade Mulo no Timoroan tomak katak, “Ha’u Fiar Timor-Leste Sei La’o Ba Oin”. Maibé, Xefe Estadu husu mós Timoroan tomak atu reativa filafali espíritu solidariedade entre Timoroan, tanba serbisu hamutuk buat hotu sei la’o furak liután. Tanba, se karik maka la kontinua prinsípiu luta ne’ebé saudozu sira husik hela, sira sei babeur ita.

 Informa mós katak, reprezentante autoridade lokál, hanesan, administradór munisípiu Ainaro, Sr. Manuel Ramos Pinto, reprezentante F-FDTL no PNTL ba munisípiu Ainaro hamutuk ho komunidade lokál mós marka sira-nia prezensa ho entuziazmu ne’ebé maka’as.

 Iha Xefe Estadu nia vizita ne’ebé sei kontinua ho diálogu komunitáriu durante semana rua nia laran ne’ebé hahú iha segunda-feira, 19 Outubru, Xefe Estadu hetan akompañamentu husi Sra. Francisca Monica Fatima Soares, hanesan Xefe Suku Soba, postu administrativu Laga, munisípiu Baucau, no mós Sra. Berta Santa Goncalves Vieira, hanesan administradór postu administrativu Dom Aleixu, munisípiu Dili, no mós ho asesór tékniku sira.