S.E. PREZIDENTE REPÚBLIKA, TMR, HALA’O DIÁLOGU KOMUNITÁRIU IHA SUKU USECAI

by Media Team Posted on

Suai, 22 Outubru, 2015 – S.E. Prezidente Repúblika, Taur Matan Ruak, iha kinta-feira, hala’o diálogu komunitáriu ho komunidade suku Usecai, postu administrativu Zumalai, munisípiu Covalima, molok kontinua ho diálogu komunidade iha suku Lour, postu administrativu Bobonaro iha lokraik.

 S.E. Prezidente Repúblika hahú hato’o nia intervensaun hodi halo kómiku ho komunidade Usecai hodi dehan katak, sira hatán kestaun di’ak ka lae ho resposta ne’ebé kontra malu. Hafoin, nia sei fila bá Dili no hato’o ba Xefe Governu, Dr. Rui Maria Araújo, katak, Xefe Estadu hadomi Primeiru-Ministru maibé la hadomi estrada tama suku Mape no Usecai.

 Hafoin Xefe Estadu introdús nia bainaka espesiál na’in- rua ne’ebé akompaña nia durante viajen hamutuk ho Administradór munisípiu Covalima no mós reprezentante autoridade lokál sira seluk ne’ebé marka prezensa.

 Iha diálogu ho komunidade iha suku rua ne’ebé refere, Xefe Estadu, klarifika katak, objetivu husi lori bainaka na’in-rua nu’udar refere atu sira bele observa no kompara diferensa hirak entre sira-nia suku no postu administrativu sobre saida maka sira bele aprende husi sira-nia vizita hirak-ne’e. Depois Xefe Estadu mós esklarese liután sobre objetivu husi nia vizita ne’ebé atu:

  • Hato’o Prezidente Repúblika nia apresiasaun sinsera ba komunidade suku rua ba sira-nia kontribuisaun atu halo Timor-Leste sai hanesan nasaun independente,

  • Haree realidade komunidade sira-nian

  • Husu komunidade sira, se sira sei prontu atu kontinua serbisu hamutuk maka’as liután. Tanba, independénsia hetan ona, mas la’ós ‘moris-di’ak’,

  • Husu mós ba komunidade sira atu serbisu hamutuk maka’as liután atu realiza mehi atu hetan moris-di’ak.

 Pontu importante ida maka katak, Timor-Leste konsege mantein pás, organiza an atu serbisu hamutuk no prepara planu ne’ebé di’ak atu dezenvolvimentu bele la’o ba oin tuir prioridade urjente bazeia ba komunidade nia nesesidade hirak.

 Xefe Estadu mós refere ba komunidade sira iha diálogu iha suku Usecai sobre serbisu importante haat ne’ebé sira presiza hala’o: hadi’ak sira-nia ekonomia; investe ba oan sira-nia eskola no hamate lia-mate no lia-moris; kuidadu sira-nia saúde, no husu Timoroan hotu atu serbisu hamutuk ka halo serbisu ‘gotong royong’, hafoin husu mós hapara violénsia doméstika hasoru feto sira.

 Tama ba iha sesaun husu no hatán, komunidade suku Usecai hato’o sira-nia preokupasaun hirak, nu’udar ezemplu: fornesimentu ahi ne’ebé sira ladauk iha, fornese daudaun ona ‘solar panel’ foun atu fasilita sira iha suku Usecai, hamenus pensaun vitalísia, falta bee moos, hadi’ak kondisaun estrada (ne’ebé dala barak udan sobu iha tempu bailihun) atu lori produtu lokál ba fa’an, harii postu saúde ida, ajuda mákina suku roupa nian, eis-soldadu/veteranu sira-nia naran ladauk hetan valorizasaun tanba naran ladauk rejistu to’o agora no mós preokupasaun seluseluk tan.

 Hatán ba komunidade nia preokupasaun, S.E. Prezidente Repúblika dehan katak, nia haksolok tebes rona oinsá membru komunidade Usecai hato’o sira-nia preokupasaun ho lala’ok ne’ebé di’ak tebes. Hafoin, hato’o ba komunidade sira katak, fornesimentu eletrisidade sei mai mezmu neineik. Ko’alia sobre Pensaun Vitalísia, Xefe Estadu dehan, nia ko’alia beibeik sobre asuntu ida-ne’e ho bankada sira hotu. No hetan resposta katak, deputadu sira hotu hakarak muda, maibé, só iha 2016.

Ko’alia sobre kestaun atu harii postu klínika, Xefe Estadu dehan katak, Estadu nia polítika maka atu harii postu klínika ida no fornese ofisiál médiku ba kada suku ida. Maibé, preokupasaun ne’ebé maka hato’o ona, Xefe Estadu rejistu ona no sei hato’o ba órgaun soberanu kompetente hirak.

 Hatán sobre kestaun ba valorizasaun ba veteranu sira, Xefe Estadu dehan katak, Estadu Timor-Leste halo esforsu hotu atu rejistu no valoriza veteranu sira. Maibé, husu mós ba veteranu iha suku Usecai atu organiza an atu hadi’ak sira-nia dadus, inklui buka solusaun. Iha 2015, Governu Timor-Leste so sei trata de’it sira balun. Tanba, nasaun balun ne’ebé maka independénsia kleur ona hanesan Angola no Indonézia ladauk rezolve sira-nia asuntu veteranu. Klarifika mós katak, asuntu veteranu sai hanesan preokupasaun nasionál ida, mas, asuntu veteranu mós hamosu preokupasaun rua entre veteranu sira-ne’ebé simu ona osan ho sira-ne’ebé ladauk simu ona.

Hafoin, preokupasaun sobre sustentabilidade ba kondisaun, liuliu iha aspetu finanseiru. Wainhira responde ba kestaun husi grupu feto sira-ne’ebé husu mákina, Xefe Estadu dehan katak, esforsu sei halo atu buka ajuda sira ho mákina suku roupa, no husu ba grupu feto atu uza ba serbisu duni, inklui mós atu asiste televizaun ida ba suku Usecai, maibé husu atu labele uza de’it ba harii filmi duke notísias, ajuda mós bola no simentu atu hadi’ak eskola ne’ebé maka laran aat ona.

 Nu’udar hala’o ona iha diálogu uluk hirak (346), fó mós oportunidade ba reprezentante autoridade lokál no diretór sira-ne’ebé maka oferese sira-nia akompañamentu atu hatán ba preokupasaun hirak-ne’ebé maka membru komunidade sira hato’o sobre planu no asaun hirak-ne’ebé maka akontese daudaun iha kada setór dezenvolvimentu.