S.E. PR, TMR: IHA INAGURASAUN MONUMENTU EIS DEPUTADU CNRT SAUDOZU MATEUS DE JESUS

by Media Team Posted on

Bobonaro, 24 Outubru 2015 – S.E. Prezidente Repúblika, Taur Matan Ruak, partisipa iha inaugurasaun gruta Nosa Senõra Imaculada Conceição no monumentu ba eis-deputadu Bankada CNRT, Saudozu Mateus de Jesus, iha sábadu dadeer-saan iha suku Colimão, postu administrativu Bobonaro, munisípiu Bobonaro.

Iha nia intervensaun, Xefe Estadu deklara ba públiku katak, Estadu ho Igreja halo kompletu malu. Tanba, ketaketak Estadu no Igreja la funsiona. Hafoin, apelu liután ba komunidade sira atu hametin sira-nia fé no halo sakrifísiu atu ajuda ema ne’ebé maka kbiit-laek.

Xefe Estadu hato’o deklarasaun ne’ebé refere hafoin rona lia-menon husi Bispu Dioseze Bobonaro, Dom Norberto Amaral, no mós lideransa Kolimau 2000, ka eis-Sekretáriu Estadu ba Veteranu no Antigu Kombatente, Sr. Julio Meta Malik.

Bispu Dioseze Bobonaro, Dom Norberto Amaral, iha nia diskursu hanesan oradór primeiru halo apelu ba komunidade tomak tau sira-nia fé ba iha Santa Igreja nia hanorin. Maibé, subliña mós ba komunidade sira atu evita kria kostume foun atu labele hakoi tan ona sira-nia matebian iha uma oin, hafoin husu atu komunidade sira-ne’ebé atende serimónia atu utiliza semitériu públiku. Apelu mós atu labele uza símbolu artes marsiais oioin iha rate leten atu wainhira hakoi komunidade sira-nia matebian.

Iha parte seluk, Sr. Julio Meta Malik, halo apelu ba membru organizasaun Kolimau 2000 atu hamutuk hodi fó apoiu ba Estadu. Nia husu mós ba membru organizasaun ne’ebé refere atu evita lala’ok aat no tenke kalma depois uza liu sira-nia ulun. Husu boot katak, iha 2017, organizasaun ne’e bele hamutuk filafali atu halo buat ruma.

Informa mós katak, hafoin serimónia bensa no misa, Xefe Estadu hamutuk ho Vise Prezidente Parlamentu Nasionál, Adriano do Nascimento, Ministru Edukasaun, Sr. Antonio da Conceição no mós konvidadu sira seluk pasa almosu hamutuk molok kontinua nia atividade diálogu komunitáriu iha suku Obulu, postu administrativu Atsabe, munisípiu Ermera.