PREZIDENTE REPÚBLIKA TAUR MATAN RUAK HALA’O DIÁLOGU HO KOMUNIDADE SUKU BABULU

by Media Team Posted on

Manufahi-Babulu, 10 Novembru, 2015 – S.E. Prezidente Repúblika, Taur Matan Ruak, ne’ebé maka akompañadu husi Primeira Dama, Isabel da Costa Ferreira, komitiva, bainaka espesiál rua no autoridade lokál hala’o diálogu komunitáriu ho komunidade sira iha suku Babulu, postu administrativu Same Vila, munisípiu Manufahi iha tersa-feira dadeer ne’e.

Ba vizita ne’ebé maka liu ona 350 ne’e, Xefe Estadu mós lori ho nia bainaka espesiál na’in-2: Administradór postu administrativu Uato Carbau no Xefe-Suku Samalari husi postu administrativu Baguia, munisípiu Baucau.

Xefe Estadu hahú nia intervensaun hodi dehan ko’alia sobre reklamasoins ne’ebé dehan Prezidente bá buka votus, mas, loloos, nia hakarak atu kompleta nia kompromisu ne`ebé nia halo iha kampaña.

Hafoin Xefe Estadu esplika sobre objetivu husi nia vizita ne`ebé atu:
Hato’o nia agradesimentu ba sakrifísiu no kontribuisaun ne’ebé povu halo ona atu Timor-Leste sai nasaun independente ida.
Rona (no haree) populasaun sira-nia preokupasaun no sira-nia hanoin, se sira sei prontu nafatin ka lae atu kontinua luta ba moris-di’ak.
Informa ba populasaun sobre planu Timor-Leste nian ba futuru (no saida maka ita halo ona no ladauk halo).

Hafoin, Xefe Estadu mós fó serbisu importante balun ba komunidade sira atu:
Tau matan ba Ekonomia, signifika katak halo servisu ne`ebé mak di’ak atu hadi’a imi-nia família nia ekonomia, halo to`os, halo natar, kuda ai-horis,
Investe iha oan sira-nia ba eskola, atu haruka oan sira ba eskola tenke hamenus halo lia-mate no lia-moris, tanba edukasaun mak bele muda família sira-nia moris, hodi hadi’a ekonomia iha família.
Tau matan ba imi-nia saúde, kuidadu imi-nia saúde. Tanba Timor-Leste sei iha 49% maka sofre malnutrisaun, liuliu labarik no inan-feton sira, tanba nasaun forte só forte kuandu família forte.
Servisu hamutuk, solidariedade “Gotong Royong” ho autoridade lokál hanesan, fiar ba liurai, fiar ba Xefe-Suku atu hamutuk hodi hadi’a iha imi-nia munisípiu, suku no aldeia.

Mas, komunidade sira iha suku Babulo mós hato’o sira-nia preokupasaun liuhusi sesaun husu no hatán sobre: estrada, eskola, bee moos, eletrisidade, postu saúde no problema veteranus.

Hatán ba preokupasaun sira-ne`e Xefe Estadu Taur Matan Ruak hatete:
“Preokupasaun hirak-ne`e la’ós imi-nian de’it. Tanba, suku tomak iha Timor-Leste nia laran iha mós preokupasaun hanesan.”

Maibé, Xefe Estadu mós la promete mas sei hadi’ak neineik maibé beibeik. No, loron ida dezenvolvimentu sei to’o iha sira-nia suku.

Prezidente Repúblika mós aproveita okaziaun ne’e hodi husu ba veteranu sira atu fó apoiu xefe-suku hodi servisu iha sira-nia suku. Tanba, kuandu halo di’ak, ema sei ko’alia di’ak sobre veteranu sira. Mas, kuandu halo aat ema sei ko’alia aat xefe-suku no veteranu sira hola parte suku mós.

Hatán kona-ba preokupasaun estudante sira kona-ba bolsa-estudu, Xefe Estadu dehan bolsa-estudu husi Ministériu Solidariedade Sosiál ne’e mós iha, maibé ho orsamentu ne’ebé ki`ik no tenke rejistu iha dadus ministériu nian ba ema kbiit-laek nia oan sira. Ministériu Edukasaun nian iha, maibé estudante sira tenke liu prosesu kompete ho notas no/ka valór ne’ebé di’ak maka foin bele hetan.

Molok rona Xefe Estadu nia intervensaun nu’udar hakerek iha leten, Xefe-Suku Babulu hahú diálogu ne’e hodi relata sobre monografia suku Babulu nian, ne’ebé iha aldeia 8, no totál populasaun hamutuk 4.243. Maioria komunidade 65% moris ho vida agrikultór, ho vida negosiante 10% no funsionáriu 15%. Hafoin, autoridade lokál sira mós hato’o sira-nia haksolok ba prezensa Prezidente Repúblika no Primeira Dama ba primeira vés ne’e, tanba, dezde Ukun-An la iha na’i-ulun ida mak mai vizita sira-nia suku.