PREZIDENTE REPÚBLIKA TAUR MATAN RUAK HALA’O DIÁLOGU HO KOMUNIDADE SUKU DAISUA

by Media Team Posted on

Manufahi-Daisua, 10 Novembru, 2015 – S.E. Prezidente Repúblika, Taur Matan Ruak, ne’ebé maka akompañadu ho Primeira Dama, Isabel da Costa Ferreira nian, hamutuk ho komitiva no autoridade lokál, hala’o diálogu ho komunidade sira iha suku Daisua, postu administrativu Same Vila, munisípiu Manufahi iha tersa-feira lokraik ne’e.

Ba vizita ne’ebé maka liu ona 350 ne’e, Xefe Estadu mós lori ho nia bainaka espesiál na’in-2: Administradór postu administrativu Uato Carbau no Xefe-Suku Samalari husi postu administrativu Baguia, munisípiu Baucau.

Komunidade suku Daisua fó-agradese tebes ba Xefe Estadu, tanba Xefe Estadu hatudu domin ba povu ne’ebé moris iha área rurais. Maibé, suku refere ladauk hetan asesu ba fornesimentu eletrisidade, liuliu ba aldeia haat iha suku nia laran. Maski nune’e, suku Daisua prontu serbisu hamutuk ho Estadu no governu atu hala’o dezenvolvimentu iha sira-nia suku atu hetan dezenvolvimentu.

Hatán sobre komunidade sira-nia preokupasaun, Xefe Estadu hatete, preokupasaun hirak-ne`e la’ós iha suku Daisua de’it. Maibé iha suku hotu ne`ebé nia vizita ona hanesan. Governu no Estadu halo esforsu atu rezolve sira-nia preokupasaun hirak ne`ebé hato’o, no sei lori tempu naruk atu bele hadi’a, nune’e husu ba komunidade sira atu iha pasiénsia hodi hein.

Xefe Estadu hatutan liután katak, ba suku no aldeias hirak-ne`ebé maka seidauk hetan eletrisidade, husu atu iha pasiénsia hodi hein. Tanba, molok eletrisidade tama, dala uluk presiza iha ka hadi’ak uluk estrada.

Iha fatin hanesan komunidade suku Daisua mós preokupa ho Ukun-An ne`e, liuliu sobre kestaun seguransa. Tanba, uluk luta atu hetan independénsia, maibé hafoin Ukun-An tiha, tansá maka Timor-Leste sai fali dalan tráfiku droga.

Hatán kona-ba ne`e Prezidente Repúblika Taur Matan Ruak hatete, husu ba juventude sira atu labele hetan influénsia husi droga, se kuandu joven sira tuir entaun sira-nia futuru sei la’o laloos.

Iha relatóriu ba Xefe Estadu, Xefe-Suku Daisua relata iha monografia husi totál populasaun, 3.314, ne’ebé maka kompostu husi aldeia haat. Jeralmente, populasaun suku ne’e hala’o moris ho vida agrikultura no sistema tradisionál.