S.E. Prezidente Repúblika TMR Husu Atoni-oan Sira Apoiu Projetu ZEESM

by Media Team Posted on

Pante Makassar-Ambeno, 29 Novembru, 2015 – S.E. Prezidente Repúblika, Taur Matan Ruak, halo apelu ba Atoni-oan sira atu fó apoiu másimu atu nune’e projetu Zona Espesiál Ekonomia Sosiál Merkadu (ZEESM) Oe-cusse-Ambeno, ne’ebé maka oras ne’e la’o daudaun bele susesu. Xefe Estadu hato’o apelu ne’ebé refere hafoin vizita tiha projetu foun Sentrál Elétrika iha Inur Sakato, Pante Makassar iha kinta-feira semana kotuk foin lalais ne’e.

“Hanesan Prezidente Repúblika, hakarak apelu ba Oe-cusse oan sira, autoridades, akadémikus, joven, lideres komunitárius, lideres tradisionais, populasaun tomak para fó apoiu tomak ho másimu ba susesu projetu ZEEMS iha Oe-cusse, tanba, projetu ida-ne’e la’o iha Oe-cusse. 12 munisípiu iha Timór kesi kabun hela para Oe-cusse iha orsamentu ida boot liu. Ne’e hanesan oportunidade ba Oe-cusse oan sira. Tanba ne’e, Prezidente husu Ita-Boot sira atu ajuda halo projetu ida-ne’e sai susesu”, Xefe Estadu hato’o iha nia apelu.

Hafoin observa tiha obra refere, Xefe Estadu sente kontente no orgullu hodi fó parabéns ba Prezidente Autoridade Rejiaun Administrativa Espesiál Oecusse-Ambeno (RAEO), Dr. Mari Alkatiri, ho nia ekipa tomak no ba kompañia Wika ba susesu preparativus ba komemorasaun festa tinan 500 iha Lifau no mós tinan 40 Proklamasaun Independénsia nian, ba esforsu boot atu finaliza sentrál elétrika ho kapasidade 17,6 MW ne’ebé maka funsiona ona antes loron komemorasaun hodi fó naroman ba Oe-cusse tomak.

Xefe Estadu hatutan:
“Iha 2012 kuandu ha’u mai Oe-cusse, povu Oe-cusse dehan, Prezidente ami bá buka serbisu iha Dili ami la hetan serbisu. Entaun ha’u hatete ba sira, imi lalika ba Dili, ami maka sei lori Dili mai iha Oe-cusse, i ohin iha projetu boot ida iha Oe-cusse.”

Antes termina Xefe Estadu dehan susesu projetu ZEESM iha Oe-cusse hanesan mós susesu boot ba Timor-Leste. Tanba objetivu Ukun-An maka oinsá kore an hosi kiak no mukit.

Xefe Estadu mós hala’o observasaun ba konstrusaun ponte foun no irrigasaun foun iha Mota Tono.
Iha vizita ne’e, Xefe Estadu akompañadu hosi Primeira Dama Isabel Ferreira, Prezidente RAEO Dr. Mari Alkatiri, Prezidente Parlamentu Nasionál, Vicente Guterres, Primeiru Ministru Dr. Rui Maria Araújo ho membru governu Balun, no konvidadus importante sira seluk.