S.E. Prezidente Repúblika Taur Matan Ruak Inaugura Monumentu Lifau

by Media Team Posted on

Lifau-Oe-cusse-Ambeno, 30 Novembru, 2015 – S.E. Prezidente Repúblika, Taur Matan Ruak, hamutuk ho Prezidente Autoridade Rejiaun Administrativa Espesiál Oe-cusse-Ambeno (RAEO), Dr. Mari Alkatiri, no bainaka VIP sira, iha sesta semana kotuk, hala’o inaugurasaun ba monumentu Lifau, Pante Makassar, Oe-cusse, ne’ebé nu’udar eransa hosi Estadu Timor-Leste ba komemorasaun tinan 500 wainhira navegadór portugés sira hala’o kontaktu dahuluk ho Timoroan sira iha tinan 1515 iha Lifau.

Inaugurasaun monumentu refere hahú ho misa solene Bispu Dioseze Baucau no Administradór Apostóliku Dioseze Dili, Dom Basílio do Nascimento, maka dirije ho akompañamentu hosi Bispu Dioseze Maliana, Dom Norberto Amaral, Arsebispu hosi Bukareste (Roménia), reprezentante Santa Sé iha Timór no reprezentante Bispu hosi Dioseze Kupaun no Atambua nian.

Hafoin remata misa Bispu D. Basílio do Nascimento fó bensaun ba ró karavela ho medida naruk metru 6 ne’ebé iha tinan 500 liubá navegadór sira uza hodi halo viajen to’o sama ain ba dala uluk iha rai Lifau. Hafoin ne’e, serimónia kontinua ho asina plaka, ne’ebé S.E. Prezidente Repúblika Taur Matan Ruak maka halo akompañamentu hosi Prezidente RAEO Dr. Mari Alkatiri, Primeiru Ministru Dr. Rui Araújo, no Ministru Turizmu i Kultura, Francisco Kalbuadi Lay.

Xefe Estadu iha nia lia-menon hatete, hahú husi Lifau mak Timór nia identidade moris no buras.

“Iha fatin ne’e [Lifau] hahú ita-nia relasaun ho portugés sira metin no buras liután hodi marka no fó identidade ita-nian, identidade ne’ebé harii iha pilár importante hanesan lia-portugés no relijiaun katólika”, dehan Xefe Estadu.

Xefe Estadu husu ba povu Oe-cusse atu haksolok no kontente tanba husi Lifau mak Timór moris no hosi Oe-cusse mak Timór sei buras. Tan ne’e Xefe Estadu fó parabens ba Oe-cusse-oan no fó mós parabens ba Timor-oan sira hotu inklui povu portugés no povu sira husi nasaun komunidade nasaun lia-portugés (CPLP).

Hafoin remata inaugurasaun kontinua ho foto sesaun hamutuk ho bainaka VIP sira hosi nasaun amigu CPLP no amu-bispu sira.

Hola parte iha inaugurasaun refere bainaka VIP sira no enviadu espesiál sira hosi nasaun CPLP, Autoridades Governu Timor-Leste sira no komunidade rihun ba rihun.