S.E. PREZIDENTE REPÚBLIKA, TAUR MATAN RUAK, AGRADESE APOIU KOMUNIDADE OECUSSE BA KOMEMORASAUN IHA OECUSSE

by Media Team Posted on

Dili, 3 Dezembru, 2015 – S.E. Prezidente Repúblika, Taur Matan Ruak, agradese barak ba apoiu no kolaborasaun komunidade iha Rejiaun Administrativa Espesiál Oecusse-Ambeno (RAEOA) ba Komemorasaun Tinan 40 Proklamasaun Independénsia RDTL no komemorasaun Tinan 500 Interasaun Sivilizasoins Rua entre Timor-Leste ho Portugál ne’ebé mak ba tinan ida-ne’e realiza iha Pante Makassar, Oecusse-Ambeno.

Xefe Estadu ba imprensa sira iha ró navál F-FDTL nian wainhira fila hosi Oecusse katak:
“Ha’u hakarak agradese ba povu Oecusse, liuliu ba sira-nia esforsu, sira-nia partisipasaun para la’o di’ak, apezar iha organizasaun iha problema lojístika, buat báziku iha problema. Mas, jeralmente sira-nia partisipasaun di’ak. Tanba, sira-nia partisipasaun di’ak halo ita-nia bainaka sira hotu-hotu sai ho kontente, mezmu ke loron manas.”

Hafoin hato’o nia agradesimentu ba komunidade Atoni sira, Xefe Estadu mós la haluha atu hato’o nia agradesimentu ba Governu Sentrál, Exmu. Primeiru Ministru ho nia membru governu tomak, liuliu ba Ministru Planeamentu no Investimentu Estratéjiku, Kay Rala Xanana Gusmão, no mós Autoridade Rejiaun Administrativa Espesiál Oecusse-Ambeno (RAEOA).

Xefe Estadu hato’o ninia agradesimentu espesiál tebetebes ba Ministru Planeamentu no Investimentu Estratéjiku, hafoin rona istória hirak-ne’ebé maka soldadu, polísia no populasaun sira konta sobre ninia empeñamentu, ninia serbisu, ninia sakrifísiu atu festa la’o di’ak. La haluha mós atu hato’o nia agradesimentu ba Ministru sira-ne’ebé fó apoiu tomak no mós ba Autoridade Rejiaun Administrativa Espesiál Oecusse-Ambeno (RAEOA), Dr. Mari Alkatiri, ho nia ekipa tomak ba sira-nia serbisu ba susesu festa nian.

Xefe Estadu konklui hodi dehan katak, festa komemorasaun ne’ebé refere la’o ho di’ak tebes, tanba iha kooperasaun no kolaborasaun ne’ebé di’ak hosi partes hotu, la’ós mai hosi parte ida.