DEKLARASAUN HUSI S. E. PREZIDENTE TAUR MATAN RUAK REPÚBLIKA DEMOKRÁTIKA TIMOR-LESTE NIAN HAFOIN HALA’O TIHA ENKONTRU BILATERÁL HO S.E. ONORAVEL SHINZŌ ABE, PRIMEIRU MINISTRU JAPAUN NIAN

by Media Team Posted on 18 views


Tókiu, 15 Marsu 2016
Ho laran-ksolok boot ha’u mai vizita filafali Japaun, maski ne’e ha’u-nia vizita dahuluk mai Japaun nu’udar Xefe Estadu.
Ha’u hato’o ha’u-nia obrigadu ba governu no povu Japaun tanba imi-nia laran-luak no laran-kmanek hodi simu ha’u no ha’u-nia delegasaun, no hakarak agradese mós ba programa ofisiál ne’ebé mak oferese mai ami.
Ha’u hakarak hahú hodi hato’o ha’u-nia omenajen ba povu Fukushima no mós ba memória hosi sira-ne’ebé mak sai vítima ba katástrofe tinan lima liubá hodi halo Japaun tama iha lutu no halo ami hotu hakfodak. Ami mós terus ho imi-nia terus. //
Objetivu husi ha’u-nia vizita ne’e maka hakle’an liután relasaun amizade no kooperasaun entre Timor-Leste no Japaun. Ita-nia relasaun bilaterál metin tebetebes iha nivel hotu-hotu. Kooperasaun entre ita-nia governu ne’e luan no produtivu tebes.
Liutiha Restaurasaun Independénsia, Timor-Leste harii pás no estabilidade. Ita demokrasia ida no Estadu Direitu. Japan nia apoiu ne’e sai importante ba ami atu to’o ba objetivu sira-ne’e. Susesu ne’ebé mak ami hetan fó posibilidade mai ami atu fó atensaun boot liután ba dezenvolvimentu ekonómiku no sosiál nia prioridade sira.
Ami-nia kooperasaun ho Japaun la’o tuir evolusaun hirak-ne’e. Oras ne’e ita-nia parseria foka liu ba kualidade infraestrutura sira-nian; ba apoiu ba sosiedade nia inisiativa ekonómika; no mós ba setór produtivu nasionál ne’ebé presiza atu dudu ba oin.
Timor-Leste hakarak haburas setór emprezariál privadu ida ne’ebé dinámiku no kompetitivu. Ha’u konvida emprezáriu sira Japaun nian hodi hala’o vizita ba ami-nia rain ho objetivu atu koñese di’ak liután oportunidade ne’ebé mak iha atu hametin ita-nia relasaun emprezariál no komersiál sira.
Hasa’e kontaktu kulturál, sosiál no ekonómiku hanesan buat ida ne’ebé importante iha nivel hotu-hotu. Tanba ne’e maka ha’u sente ksolok tebes ho programa interkámbiu ba jerasaun foun sira, ne’ebé diskute ona ho señór Primeiru Ministru, ne’ebé nia objetivu maka habiit interkámbiu entre foin-sa’e sira japonés no timoroan.
Timor-Leste no Japaun hanesan demokrasia hotu ne’ebé koopera ba pás no ba ita-nia povu sira-nia moris-di’ak. Ha’u-nia rain fiar katak diálogu no negosiasaun bele rezolve konflitu sira-ne’ebé mosu entre Estadu sira, iha respeitu ba Konvensaun sira Nasoins Unidas nian no Direitu Internasionál, inklui UNCLOS nu’udar meius atu tulun rezolve konflitu kona-ba tasi.
Ha’u agradese mós apoiu hosi governu Japaun ba Timor-Leste atu bele sai hanesan membru ASEAN nian no mós asisténsia ne’ebé governu Japaun fó ona ba Timor-Leste nia preparasaun atu tama ba asosiasaun refere.
Relasaun amizade entre ita-nia nasaun rua ne’e sei sai metin liután ba beibeik. Mai ita serbisu hamutuk hodi hametin liután relasaun entre país rua ne’e.
Ha’u hakotu hodi hato’o ha’u-nia votus prosperidade no moris-di’ak ba Japaun ho povu japonés. Obrigadu barak ba Ita-Boot sira hotu.

Author

Media Team