MENSAJEN HOSI S.E. PREZIDENTE REPÚBLIKA TAUR MATAN RUAK IHA OKAZIAUN TOMADA POSE BA S.E. REVERENDÍSIMU BISPU DÍLI NIAN, D. VIRGÍLIO DO CARMO DA SILVA

by Media Team Posted on 34 views

Iha loron ne’ebé Reverendísimu Bispu D. Virgílio do Carmo da Silva hahú misaun apostólika foun ida nu’udar mahein ba Dioseze Díli nian, ha’u hakarak hato’o votus parabéns no susesu pastorál no pesoál ba Reverendísimu Bispu.

Knaar importante tebes ne’ebé Kreda Katólika hala’o durante ne’e hodi forma Timoroan sira-nia identidade nu’udar sarani, lori nia atu okupa fatin ida ne’ebé úniku iha ita-nia sosiedade. Sakrifísiu ne’ebé relijiozu no relijioza katóliku barak halo hodi hakribi sira-nia interese rasik atu luta ba Timoroan sira-nia dignidade durante tinan barak nia laran, halo Kreda Katólika sai nu’udar ai-riin ba ita-nia identidade nasionál.

Estadu ho Igreja sira-nia misaun no responsabilidade la’o ketak. Maski nune’e, sira la’o hamutuk hodi forma sidadaun timoroan, mane ho feto, atu sai sidadaun onestu no laran-moos, no mós hodi harii sosiedade ida ne’ebé hatuur iha prinsípiu solidariedade kristaun, lia-loos no domin.

Nu’udar katóliku, sidadaun no Prezidente Repúblika, ha’u sei serbisu hamutuk ho D. Virgílio do Carmo da Silva no mós ho Igreja tomak ho objetivu atu tulun hametin pás no armonia iha ita-nia rain no haburas sosiedade ida ne’ebé hatuur iha prinsípiu integridade, respeitu no dominbamalu.

Ha’u fó parabéns ba katóliku sira dioseze Díli nian no mós ba Kreda Katólika nasionál tomak, iha loron ne’ebé katóliku sira ho laran-ksolok hato’o boazvindas ba sira-nia bispu foun ne’e.

Ha’u hakotu hodi hato’o ha’u-nia votus saúde di’ak no moris naruk ba D. Virgílio do Carmo da Silva.

Iha loron 19 fulan-Marsutinan 2016.

Taur Matan Ruak

MENSAJEN HOSI S.E. PREZIDENTE REPÚBLIKA TAUR MATAN RUAK IHA OKAZIAUN TOMADA POSE BA S.E. REVERENDÍSIMU BISPU DÍLI NIAN, D. VIRGÍLIO DO CARMO DA SILVA

Author

Media Team