KOMUNIKADU IMPRENSA:SUA EXELÉNSIA PREZIDENTE TAUR MATAN RUAK HATO’O SENTIMENTU LARAN-TRISTE NO KONDENA MAKA’AS ATAKE TERRORISTA IHA BÉLJIKA

by Media Team Posted on 14 views

Prezidente Repúblika “kondena maka’as” no hato’o nia “sentimentu laran-triste” ba masakre ne’ebé rezulta hosi atentadu terrorista sira iha Béljika.

Iha nia mensajen ba Sua Majestade Liurai Philippe hosi Béljika, Prezidente Taur Matan Ruak hatete katak ho “laran-triste tebes no laran-todan” mak nia rona infomasaun kona-ba atentadu terrorista iha Bruxelas, no lori povu no nia naran no mós nia naran rasik, hato’o ba Liurai no Povu Béljika katak nia “kondena no sente laran-triste” ho asaun kriminozu ne’ebé mak akontese foin lailais ne’e.

“Violénsia kriminoza no masakre hasoru ema sala-laek sira hanesan asaun ne’ebé bá kontra valór sivilizasionál fundamentál sira-ne’ebé ita-nia povu sira fahe lisuk no ne’ebé sai hanesan ai-riin ba ita hotu nu’udar nasaun demokrátiku. Nune’e, labele tolera ka justifika hahalok hirak-ne’e iha sirkunstánsia ne’ebé de’it”, dehan Xefe Estadu Timor-Leste iha nia mensajen.

Prezidente Taur Matan Ruak hatutan mós katak atake iha Bruxelas hametin demokrasia sira-nia determinasaun atu tau aas valór liberdade no respeitu ba ema ida-idak nia moris.

“Povu Béljika nia terus no lutu ba atake sira-ne’ebé akontese iha Bruxelas hametin ami-nia solidariedade tomak ba terrorizmu nia vítima hotu-hotu no hametin mós ami-nia determinasaun atu tau aas nafatin valór sivilizasionál sira hanesan respeitu ba ema ida-idak nia moris no liberdade nu’udar ai-riin ba Estadu Direitu, n’ebé hanesan konkista ida hosi povu hotu-hotu”, dehan Xefe Estadu.

“Iha momentu susar ida-ne’e, ha’u-nia hanoin tomak no orasaun hamutuk ho memória vítima sira-nian no mós ho sira-nia família”, nia hatutan.

 

Palásiu Prezidensiál Nicolau Lobato, 23 Marsu, 2016.

 

Author

Media Team