S.E. PREZIDENTE REPÚLIKA, TAUR MATAN RUAK, SIMU APREZENTASAUN KREDENSIÁL EMBAIXADÓR FOUN HUSI MALÁZIA NO TAILÁNDIA

by Media Team Posted on

Dili, 14 Abríl, 2016 – S.E. Prezidente Repúblika, Taur Matan Ruak, simu karta kredensiais Embaixadora Estraordinária no Plenipotensiária foun hosi Federasaun Malázia nian, Chitra Devi A/P Ramiah, ne’ebé troka eis Embaixadór, Tajul Mohammad, no Embaixadora hosi Reinu Tailándia nian, Patchanee Kithavorn, ne’ebé troka eis Embaixadora Buskorn Prugaspongse, iha Palásiu Prezidente Nicolau Lobato, iha tersa-feira ne’e.

Informa mós katak, iha okaziaun ida-ne’e, Xefe Estadu hetan akompañamentu husi Vise Ministru Negósius Estranjeirus, Roberto Soares Cabral.

Hafoin aprezentasaun kredensiál, Xefe Estadu hala’o enkontru dahuluk ho embaixadór foun na’in-rua no hato’o nia benvindu, no hato’o mós agradesimentu ba nasaun rua nia apoiu ba Timor-Leste durante ne’e, nu’udar ezemplu hanesan sira-nia apoiu ba adezaun Timor-Leste nian ba ASEAN.

Xefe Estadu mós husu ba Embaixadór na’in-rua atu serbisu hamutuk ho Governu Timor-Leste atu haree área hirak-ne’ebé Timor-Leste presiza atu esplora no dezenvolve.

Husi parte Embaixadór na’in-rua nian, sira kompromete ba Xefe Estadu sobre nasaun rua nia vontade atu kontinua reforsa nafatin kooperasaun ho Timor-Leste ne’ebé maka hala’o ona durante ne’e.

Haktuir filafali ba fonte ne’ebé maka iha, Malázia hala’o nia kooperasaun ho Timor-Leste iha setór defeza, edukasaun no agrikultura. Parte Tailándia nian mós hala’o kooperasaun iha setór agrikultura, turizmu no edukasaun.