KOMUNIKADU BA IMPRENSA: S.E. PREZIDENTE REPÚBLIKA, TAUR MATAN RUAK, HATO’O SOLIDARIEDADE BA POVU EQUADOR

by Media Team Posted on

 Dili, 21  Abríl, 2016S.E. Prezidente Repúblika, Taur Matan Ruak, hato’o sentimentu solidariedade ba Estadu no povu Ekuadór hafoin hetan dezastre naturál rai-nakdoko maka’as ho magnitude 7,8 iha eskala Richter, ne’ebé maka akontese durante loron rua iha loron 16 no 17 Abril. Sentru rai-nakdoko ne’e iha 27 kilómetros hosi súl sidade Muisne iha provínsia Esmeraldas no 170 kilómetros hosi noroeste Quito, kapitál país.

Rai-nakdoko ne’ebé akontese iha Ekuadór sente mós iha nasaun viziñu sira, hanesan Kolómbia no Peru. Avizu ba tsunami konsege fó sai hosi Sentru Alerta Tsunami Pasífiku nian ba Kolómbia, Costa Rika, Ekuadór, Panamá no Peru.

Relatóriu hatete katak pelumenus ema hamutuk 246 mate no ema 2.500 hetan kanek iha rai-nakdoko ne’e. Uma sira iha área ne’ebá barak mak hetan estragu afetada hosi dezastre refere. Durante istória Ekuadór nian, rai-nakdoko ida-ne’e boot liu hafoin akontese iha Tumaco iha tinan 1979 no 1987.

“Iha biban ida-ne’e, hanesan Prezidente Repúblika, ha’u sente triste no xoke tebes bainhira rona kona-ba akontesimentu dezastre naturál rai-nakdoko ne’ebé akontese iha Ekuadór. Dezastre ida-ne’e halo Estadu no Povu sira lakon buat importante barak iha sira-nia moris.

 “Hodi Estadu no Povu Timor-Leste nia naran, hakarak hato’o ami-nia sentimentu solidariedade no mós profundu sentidu pézames ba Estadu no Povu Ekuadór, liuliu ba sira-ne’ebé maka lakon sira-nia família no fatin sira horik bá.”

 “Ho esperansa boot, ha’u husu ba lideransa no povu Ekuadór atu iha pasiénsia no forte nafatin iha momentu difisil ida-ne’e. Maromak sei tulun ita-bot sira nafatin.”

 Rai nakdoko ne’ebé akontese iha Ekuadór hapara mós atividade iha Aeroportu Internasionál José Joaquín de Olmedo iha kapitál país. Aleinde ne’e iha sidade Manta, aeroportu lokál mós konsege taka tanba hetan estragu iha parte balun. Iha Quito, kapitál país, uma 6 hetan estragu totál no eletrisidade mós la funsiona iha área refere.

Estadu emerjénsia iha Ekuadór. Autoridade lokál mobiliza soldadu militár hamutuk 10.000 no Polísia hamutuk 3.500 hodi fó tulun halo evakuasaun ba vítima rai-nakdoko. Dezastre ne’e halo Prezidente Ekuadór, Rafael Correa, tenke hapara nia vizita traballu ba Itália.