KOMUNIKADU BA MIDIA :S.E. PREZIDENTE REPÚLIKA, TMR, HARUKA KARTA KONDOLÉNSIA BA JAPAUN KONA-BA RAI-NAKDOKO

by Media Team Posted on

Dili, 21 Abríl, 2016 – S.E. Prezidente Repúblika, Taur Matan Ruak, iha loron 16 fulan-Abríl 2016, haruka ona karta ida ba Imperadór Japaun nian, Akihito, liuhosi Embaixada Japaun iha Timor-Leste, hodi manifesta Xefe Estadu nia sentidu kondolénsias no solidariedade ba akontesimentu rai-nakdoko iha illa Kyushu, Japaun, foin lalais ne’e, ne’ebé tuir relatóriu media sira katak hamate ema 44, liu ema rihun ida sofre kanek no estraga infraestrutura lubuk ida.

Tuirmai karta S.E. Prezidente Repúblika ne’ebé haruka ba Imperadór Akihito:

Hakarak transmite ba Sua Majestade Imperiál no ba povu Japaun ha’u-nia profundu xoke no tristeza no sentidu kondolénsias, ha’u-nian no povu Timoroan, ba terus no devastasaun ne’ebé kauza hosi rai-nakdoko ne’ebé atinje iha illa Kyushu. Iha oras lutu ida-ne’e, ami-nia pensamentu no orasaun ba memória vítima sira-nian no sofrimentu hosi família ne’ebé iha lutu nia laran no ba sira-ne’ebé lakon sira-nia uma iha trajédia boot ida-ne’e iha Kyushu.

 Iha ha’u-nia naran no povu Timor-Leste, husu boot ba Sua Majestade transmite ba Señór Primeiru Ministru no governu Japaun ami-nia sentimentu no simpatia kle’an, iha momentu ne’ebé povu amigu Japaun enfrenta hela terus todan ida-ne’e.

 Hein katak Sua Majestade bele simu ha’u-nia konsiderasaun ne’ebé aas ba Ita-Boot.

Taur Matan Ruak

Prezidente Repúblika Demokrátika Timor-Leste nian