S.E. PREZIDENTE REPÚLIKA TMR PREZIDE REUNIAUN CSDS BA DALA V

by Media Team Posted on

Dili, 26 Abril 2016 – S.E. Prezidente Repúblika, Taur Matan Ruak, prezide reuniaun Konsellu Superiór Defeza no Seguransa (CSDS) nian dalimak, ne’ebé halo diskusaun ho matéria sobre susesaun kargus xefia iha instituisaun F-FDTL no konseitu estratéjiku defeza no seguransa nian, segunda-feira ne’e iha Palásiu Prezidente Nicolau Lobato.

Ministru Interiór, Longuinhos Monteiro ne’ebé maka ko’alia ba imprensa hafoin reuniaun remata esklarese katak:

Ohin governu ho Konselleiru Sr. Prezidente Repúblika nian iha reuniaun Konsellu Superiór Defeza no Seguransa ho ajenda rua ne’ebé maka Prezidente Repúblika koloka. Ida kestaun kona-ba situasaun Xefe Estadu-Maiór Jenerál ho nia Vise tuir proposta governu nian, no ida fali kona-ba konseitu estratéjiku defeza no seguransa nian. No, atu informa katak, matéria rua ne’e sei rezervadu iha ámbitu ba media.”

 No informa mós katak:

“CSDS hanesan órgaun konsultivu Prezidente Repúblika nian, iha opiniaun para depois sei iha tan diskusoins iha oinmai ho fali governu, para haree to’ok konsentrasaun saida maka sei bele mosu karik iha entendimentu ba desizaun futuru Sr. Prezidente Repúblika nian kona-ba knaar Xefe Estadu-Maiór Jenerál Forsas Armadas nian ho nia Vise.

 Kona-ba konseitu estratéjiku defeza no seguransa nian mós hanesan, hosi meza koloka ba Sr. Prezidente Repúblika, i Sr. Prezidente Repúblika foti desizaun katak, reuniaun tenkesér hala’o nafatin iha nivel tékniku sira-nian ba konsertasaun ba dokumentus para depois iha breve futuru aprezenta mai Sr. Prezidente Repúblika para hetan apoiu hosi Prezidente Repúblika antes lori fali ba Konsellu Ministrus hodi diskute iha nivel Konsellu Ministrus nian hodi nune’e bele transforma ba dekretu lei. Portantu, situasaun rua ne’e mak ohin diskute. Portantu hanesan oin dehan, sei iha konsentrasaun seluk. I iha loron 11 fulan-Maiu sei iha fali reuniaun Konsellu Superiór Defeza no Seguransa para atu diskute kona-ba ajenda rua ne’ebé ohin diskute ne’e.”

Hola parte iha reuniaun CSDS dalimak refere maka hanesan, Primeiru Ministru, Rui Maria de Araújo, Ministru Defeza, Cirilo Cristóvão Pinto, Ministru Interiór, Longuinhos Monteiro, Vise Xefe Estadu-Maiór Jenerál F-FDTL, Brigadeiru Jenerál Filomeno Paixão, Komandante Jerál PNTL, Komisáriu Julio Hornay, no membrus dezignadu sira seluk.

 Naran Membru sira Konsellu Superior Defeza no Seguransa nian hirak maka:

Taur Matan Ruak: Prezidente Repúblika Prezidente CSDS.

Rui Maria de Araújo: Primeiru Ministru.

Vicente Guterres: Prezidente PN la partisipa.

Hernâni Coelho: Ministru ba Negósius Estranjeirus.

Ivo Valente: Ministru Justisa.

Cirilo Cristóvão Pinto: Ministru Defeza.

Longuinhos Monteiro: Ministru Interiór.

Lere Anan Timur: Xefe Estadu Maiór Jenerál F-FDTL, la partisipa.

Julio Hornay: Komandante Jerál PNTL.

Duarte Nunes: Dezignadu hosi PN.

Domingas Alves da Silva (Bi Lou Mali): Dezignadu hosi PN.

David Dias Ximenes “Mandati”: Dezignadu hosi PN.

Nelson Belo: Dezignadu hosi PR.

Antoninho Baptista: Dezignadu hosi PR.

Egas de Araujo Moniz: Dezignadu hosi PR.