XEFE ESTADU HALO DIÁLOGU KOMUNITÁRIA IHA SUKU OSSORUA

by Media Team Posted on

 Viqueque, 20 Abríl, 2016 – S.E. Prezidente Repúblika, Taur Matan Ruak, iha kuarta-feira lokraik halo diálogu komunitária iha Suku Ossorua, Postu Administrativu Ossu, Munisípiu Viqueque.

Xefe Estadu hahú loke nia diskursu ba komunidade iha Suku Ossorua hodi hahú informa komunidade sira sobre objetivu nia vizita ba suku 442 tomak iha Timor-Leste. Hafoin kontinua hodi refere tutan ba pontu importante haat ne’ebé populasaun presiza halo atu mellora sira-nia moris.

Wainhira tama ba parte diálogu husu no hatán, komunidade sira iha suku Ossorua deklara katak, desizaun ne’ebé Xefe Estadu foti hodi reforma veteranus sira iha instituisaun F-FDTL no hamosu fali pakote rua entre Pedro Klamar Fuik ho Lere Anan Timur no konsidera katak desizaun ne’e diskrimina veteranus sira.

Hatán ba preokupasaun ne’e, Prezidente Repúblika Taur Matan Ruak hatete katak desizaun ne’ebé maka nia foti, la’ós inkonstitusionál, maibé Prezidente Repúblika, Governu ho Parlamentu Nasionál esforsu an maka’as hodi buka solusaun ba problema ne’e.

Xefe Estadu deklara ba públiku katak:

“Ha’u-nia desizaun ne’e inkonstitusionál karik, ha’u sai tiha ona husi Prezidente Repúblika, tanba uluk ha’u rasik mak ko’alia hanesan ne’e, se ha’u-nia desizaun kona-ba ezonerasaun ne’e mak inkonstitusionál, ha’u prontu sai husi Prezidente antes ha’u-nia mandatu remata.”

Aleinde kestaun ida-ne’e, komunidade sira aprezenta mós ba Xefe Estadu problema seluk hanesan, estrada, prestasaun servisu saúde no seluseluk tan.

Informa mós katak, nu’udar hala’o ona iha diálogu komunitáriu ne’ebé maka hala’o ona baibain, Xefe Estadu hetan akompañamentu husi autoridade lokál, tantu husi sivíl no mós militár, inklui nia bainaka espesiál ne’ebé sempre konvida atu akompaña Xefe Estadu durante vizita no diálogu iha suku.