XEFE ESTADU HALO DIÁLOGU KOMUNITÁRIU IHA SUKU BUILALE NO SUKU OSSU DE CIMA

by Media Team Posted on

Viqueque, 19 Abríl, 2016 – S.E. Prezidente Repúblika, Taur Matan Ruak, iha tersa-feira ne’e halo diálogu komunitáriu iha Suku Builale no iha Ossu de Cima, Postu Administrativu Ossu, Munisípiu Viqueque.

Xefe Estadu hahú loke nia diskursu ba komunidade iha Suku ne’e hodi hahú klarifika ba komunidade sira sobre objetivu husi nia vizita hirak ba suku 442 tomak iha Timor-Leste laran. No, kontinua liután hodi fó hanoin sobre pontu xave haat ne’ebé populasaun sira presiza halo atu hadi’ak sira-nia moris. Hafoin Xefe Estadu mós informa ba públiku sira sobre bainaka espesiál sira ne’ebé maka mai husi suku no postu administrativu seluk ne’ebé akompaña nia vizita durante semana laran ne’e.

Hakat tama ba sesaun husu no hatán, komunidade sira iha Suku Builale hato’o sira-nia preokupasaun ho problema veteranu nian ne’ebé oras ne’e ladauk hetan solusaun, no rekomenda ba Prezidente Repúblika atu harii konsellu veteranu nian.

Hatán ba kestaun ne’e, Xefe Estadu esplika katak nia la fiar konsellu veteranus ne’e atu rezolve problema veteranus iha Timór laran tomak, tanba konsellu veteranus la koñese veteranus sira iha Timor laran tomak.

“Harii konsellu kombatentes ne’e bele rezolve problema ka lae? Ha’u ladún fiar. Tanba ita iha problema lei, lei ne’e laloos, métodu laloos, la’ós ho harii konsellu veteranus maka atu rezolve problema ne’e hotu. Pelo kontráriu, bele aumenta tan problema”, dehan Xefe Estadu.

Aleinde ne’e komunidade sira mós hato’o kestaun sobre kazu reforma iha instituisaun F-FDTL nia laran. Tanba, komunidade sira ta’uk problema ne’e bele hamosu filafali problema hanesan tinan hirak liubá. Entaun, Xefe Estadu husu ba povu atu fiar katak, reforma ne’e sei la hamosu problema. Tanba, ema sira-ne’ebé atu reforma ne’e, uluk fó an ba mate hodi liberta rai ida-ne’e.

Iha diálogu iha parte lokraik nian ne’ebé hala’o iha Suco Ossu de Cima, populasaun sira iha suku husu ba Prezidente Repúblika atu rezolve lalais problema liña fronteira entre Timor-Leste ho Austrália atu nune’e bele asegura rikusoin Timor-Leste nian.

Xefe Estadu hatán ba kestaun ne’ebé komunidade sira hato’o hodi hatete katak:

“Ne’e nu’udar rikusoin Timor-Leste (TL) nian, nune’e Timoroan sira prontu para defende mezmu difisil. Maibé, tenke halo duni, tanba ne’e nu’udar rikusoin ne’ebé mak sei dezenvolve Timor-Leste iha futuru.”

Iha diálogu ne’ebé maka hala’o durante semana ida-ne’e, ne’e autoridade lokál husi munisípiu Viqueque hotu marka prezensa hodi akompaña Xefe Estadu nia vizita, no hetan mós oportunidade atu hatán ba kestaun balun ne’ebé maka iha ligasaun ba setór dezenvolvimentu iha munisípiu refere.