S.E. Prezidente Repúblika, Taur Matan Ruak, Halo Diálogu Komunitáriu iha Suku Uagia No Suku Uabubu

by Media Team Posted on

Viqueque, 21 Abril 2016 – S.E. Prezidente Repúblika, Taur Matan Ruak, hala’o diálogu komunitáriu iha Suku Uagia no Suku Uabubu, Postu Administrativu Ossu, Munisípiu Viqueque, iha kinta-feira ne’e.

Iha diálogu dahuluk, iha Suku Uagia, komunidade sira husu ba Xefe Estadu atu se bele karik, veta tiha lei eleisaun suku nian. Tanba, tuir sistema eleisaun suku ne’ebé oras ne’e sei utiliza, iha vantajen liu ba komunidade iha suku laran kompara ba lei eleisaun foun ba eleisaun suku ne’ebé maka iha agora. Tanba, mezmu Xefe Suku ida ne’ebé maka atu hili ne’e komunidade sira rasik koñese di’ak, maibé lei eleisaun ne’ebé maka agora diskute ne’e, la fó vantajen ba komunidade sira. Razaun maka katak, eleisaun Xefe Suku ne’ebé maka iha agora, só reprezentante konsellu ba suku maka hili diretamente no la’ós komunidade.

Hatán ba preokupasaun ida-ne’e, Xefe Estadu dehan:

“Foin daudauk, reprezentante husi Munisípiu Baucau bá hasoru ha’u iha Dili iha Palásiu. Foin daudauk, ha’u fó instrusoins, para wainhira fila ha’u sei bá ko’alia ho Ministériu Estatál. Maibé, ita fó opinioins. Polítika jerál Estadu nian governu maka trasa, sira sei iha razaun, Ita-Boot sira mós iha razaun. Agora, haree (ba) vantajen no dezvantajen, ida-ne’ebé maka di’ak liu, no ida-ne’ebé maka ladi’ak. Entaun, ha’u sei transmite imi-nia preokupasaun atu sira hanoin. Tanba, hori-bainhira, ha’u haree iha jornál, Sr. Ministru dehan eleisaun di’ak, mas aban-bainrua iha munisípiu mós halo eleisaun. Prezidente mós halo eleisaun kada tinan lima. Ita halo eleisaun ne’e la’ós de’it tolu, dala ruma haat, dala ruma liután lima ka neen. Tan agora, ita-nia tempu oinsá, ita-nia osan iha ka lae para halo eleisaun. Tuir sira-nia argumentum katak ida-ne’e, sira tenta simplifika tiha eleisaun ne’e.”

 Aleinde ne’e, komunidade sira mós halo kestaun sobre Prezidente Repúblika ninia desizaun sobre fó reforma ba Xefe Estadu Maiór F-FDTL, Maiór Jenerál, Lere Anan Timur, no aseita fali pakote foun ne’ebé maka nomeia, Pedro Klamar Fuik, atu komanda F-FDTL ne’ebé maka kontinua nafatin sai preokupasaun ba komunidade.

Hakat fali ba diálogu iha parte lokraik nian iha suku Uabubu, komunidade sira kontinua halo kestaun sobre kapasidade Sr. Pedro Klamar Fuik nian atu lidera Forsas Armadas. Tanba, tuir informasaun ne’ebé maka komunidade sira hetan katak, Pedro Klamar Fuik iha 2006 halai sai tiha husi instituisaun F-FDTL.

Hatán ba preokupasaun komunidade nian ne’e, Xefe Estadu hatete:

“Kazu 2006 ne’e liu tiha ona, ita bá ke’e fali buat ida liu tiha ona ne’e ita lakon ita-nia tempu de’it. Ema nia sala ida, ita halo sai boot, uza ida-ne’e hanesan ‘alasan’ (razaun) atu taka dalan ba nia, ne’e ita la ‘jujur’, hanesan ita la konfia ema nia kapasidade. Susesu ne’e mai husi ema ne’ebé nunka baruk atu la’o ba oin, luta nafatin, nia mós halo esforsu nafatin para fó nia kontribuisaun hanesan joven ida fó nia kontribuisaun ba nia nasaun. Tanba ne’e, ita tenke konfia. Hanesan sira-nia maun, aman ne’ebé akompaña sira, komanda sira iha tempu funu naruk, no mós ajuda sira harii forsa foun ne’e, ha’u konfia sira hotu nia kapasidade. Hahú husi sira ne’ebé foin tama no sira ne’ebé tama kleur ona. Tanba, ita-nia moris la iha sentidu iha loron ne’ebé ita komesa lakon konfiansa ba ita-nia maluk sira, tanba vida ne’e partilhada. Moris ne’e só depende ba malu, la iha ema matenek ida maka bele halo buat hotu mesak, uitoan-uitoan fó ninia kontribuisaun tuir kbiit ne’ebé ida-idak iha.”

 Komunidade sira mós hato’o sira-nia preokupasaun sobre kondisaun ba estrada, bee moos, falta pesoál saúde, liuliu ba maternidade, falta eletrisidade no asuntu seluseluk tan.

 Informa mós katak, Xefe Estadu hahú loke nia diskursu ba komunidade iha Suku ne’e hodi hahú klarifika ba komunidade sira sobre objetivu husi nia vizita hirak ba suku 442 tomak iha Timor-Leste laran. No, kontinua liután hodi fó-hanoin sobre pontu xave haat ne’ebé populasaun sira presiza halo atu hadi’ak sira-nia moris.

Xefe Estadu mós informa ba públiku sira sobre bainaka espesiál sira-ne’ebé maka mai husi suku no postu administrativu seluk ne’ebé akompaña nia vizita durante semana laran ne’e.