S.E. PREZIDENTE REPÚBLIKA, TAUR MATAN RUAK, HALA’O ÚLTIMU AUDIÉNSIA HO EMBAIXADÓR INDONÉZIA NIAN, MARCELLINUS PRIMANTO HENDRASMORO

by Media Team Posted on

Dili, 15 Jullu, 2016 – S.E. Prezidente Repúblika, Taur Matan Ruak, kuarta-feira semana ne’e iha Palásiu Prezidente Nicolau Lobato, simu audiénsia despedida Embaixadór Indonézia nian mai Timor-Leste, Marcellinus Primanto Hendrasmoro, ne’ebé sei remata nia mandatu iha fulan-Jullu ne’e nia laran hodi hato’o agradesimentu no kumprimenta Xefe Estadu molok husik Timor-Leste ba fali nia nasaun.

Iha audiénsia ne’ebé hala’o ne’e, Xefe Estadu hodi Estadu Timor-Leste nia naran agradese tebes ba Embaixadór Primanto nia serbisu wainhira asume pasta hanesan Embaixadór ne’ebé buka hametin no hadi’ak relasaun entre Timor-Leste ho Indonézia nian iha nivel hotu-hotu. Xefe Estadu mós espera katak relasaun ne’e sei furak nafatin ba oin maski truka Embaixadór Indonézia nian.

Husi parte Embaixadór Primanto, nia mós hato’o nia agradesimentu wain ba apoiu Xefe Estadu nian tantu direta no indireta ba nia serbisu hanesan Embaixadór iha Timor-Leste.

“Iha tinan tolu (3) resin nia laran ha’u-nia mandatu hanesan Embaixadór, S.E. Prezidente Repúblika Taur Matan Ruak rekoñese katak relasaun bilaterál no kooperasaun entre país rua metin tebes tantu iha nivel Estadu ho Estadu nune’e mós povu ho povu”, Embaixadór Primanto hato’o iha lian Indonézia ba imprensa sira hafoin remata audiénsia ho Xefe Estadu.

Embaixadór Primanto mós esplika liután katak, kauza hosi relasoins di’ak país rua nian maka, Prezidente Repúblika Indonézia na’in-rua mai vizita Timor-Leste tuituir malu, hanesan eis-Prezidente, Susilo Bambang Yudhoyono, antes termina nia mandatu iha tinan 2014, no kontinua ho Prezidente Repúblika Indonézia, Eng. Joko Widodo, iha primeiru anu husi nia mandatu, nune’e mós Xefe Estadu Timor-Leste, Taur Matan Ruak, ne’ebé maka hatán mós ho vizita Estadu ba Indonézia.

Embaixadór Primanto esplika liután katak, Indonézia hanesan parseiru dezenvolvimentu di’ak ba Timor-Leste ba setór dezenvolvimentu hotu, tanba ne’e, hanesan nasaun viziñu, Indonézia sei apoia maka’as dezenvolvimentu Timor-Leste nian.