KOMUNIKADU IMPRENSA: SUA EXELÉNSIA PREZIDENTE TAUR MATAN RUAK HATO’O NIA SENTIMENTU LARAN-DODOK BA PREZIDENTE FRANSA NIAN NO HAKRIBI ATAKE TERRORISTA IHA NICE

by Media Team Posted on

Dili, 19 Jullu, 2016 – Sua Exelénsia Prezidente Repúblika, Taur Matan Ruak, hato’o nia “sentimentu laran-dodok” no “hakribi” atake terrorista ne’ebé foin lailais akontese iha Nice iha loron 14 fulan-Jullu.

Prezidente Taur Matan Ruak, iha nia mensajen ba Prezidente Fransa nian François Hollande, hato’o katak “ho laran-triste no laran-todan tebes” mak nia rona kona-ba atake ne’ebé maka hamate vítima inosente liu na’in-80 iha dalan públiku iha Nice no “hato’o sentimentu laran-dodok” hodi Povu Timor-Leste nia naran no nia naran rasik.

“Atake hasoru ema sivíl sala-laek sira no hanesan atentadu hasoru valór sivilizasionál sira-ne’ebé ita fahe lisuk no sai baze ba ita-nia nasaun demokrátiku sira”, dehan Xefe Estadu iha nia mensajen. “Terrorizmu labele tolera ka justifika iha sirkunstánsia ne’ebé de’it”, nia hatutan.

Prezidente Taur Matan Ruak konsidera katak atake hirak-ne’e hametin nasaun demokrátiku sira-nia determinasaun atu tau aas valór liberdade no respeitu ba ema ida-idak nia moris.

“Povu fransés nia terus tan atake ne’ebé akontese iha Nice hametin ami-nia solidariedade tomak ba terrorizmu nia vítima sira no habiit mós ita-nia determinasaun atu tau aas valór sivilizasionál sira hanesan, respeitu ba ema ida-idak nia moris no liberdade ne’ebé sai hanesan ai-riin Estadu Direitu nian no konkista ida hosi povu hotu-hotu”, nia dehan.

“Ha’u-nia orasaun ba memória vítima sira-nian no sofrimentu hosi família ne’ebé iha lutu nia laran, no ha’u-nia hanoin ba sira-nia terus iha momentu susar ida-ne’e”, Xefe Estadu hatutan.