S.E. PREZIDENTE REPÚBLIKA, TAUR MATAN RUAK, HALA’O DIÁLOGU HO KOMUNIDADE SUKU FAHISOI NO MAUMETA

by Media Team Posted on

Aileu, 24 Jullu 2016 – S.E. Prezidente Repúblika, Taur Matan Ruak, iha domingu lokraik ne’e, hala’o diálogu komunitáriu ho populasaun Suku Fahisoi no Suku Maumeta, Postu Administrativu Remexio, Munisípiu Aileu.

Iha diálogu ne’ebé hala’o iha espasu Eskola Bázika Sentrál Maumeta ne’e, komunidade suku rua lamenta sobre atuasaun ajente saneamentu Munisípiu Díli, atu organiza vendedores ambulante sira iha kapitál nasaun nian ne’e.

Komunidade sira mós hato’o katak, ajente saneamentu sira dala ruma halo atuasaun iha forma ida violentu no la respeita komunidade sira-ne’ebé fa’an sira-nia sasán iha dalan-ninin. Tan ne’e, komunidade sira espera Estadu bele kria kondisaun hirak ne’ebé bele fasilita no fó benefísiu la’ós de’it ba vendedores mas ba mós kompradores sira.

Hatán ba kestaun ne’e, Xefe Estadu apela ba Governu atu bele buka alternativa hodi implementa sistema kontrolu ne’ebé di’ak. Mas, Xefe Estadu mós fó-hanoin ba vendedores ambulante sira (pedagang kaki lima) atu halo tuir regras hirak ne’ebé Governu estabelese tiha ona, atu nune’e labele transforma fali sidade Díli hanesan “Sidade dezorganizadu”.

“Ha’u sensibilizadu ho imi-nia problema. Ha’u hanoin ita-nia Estadu tenke haree ida-ne’e. Ita-nia sistema kontrolu la iha, duni ema arbiru de’it. Mas, ha’u haree ita komesa organiza neineik-neineik. Espera ita bele organiza di’ak liu iha futuru”, dehan Xefe Estadu.

Bazeia fali ba ida-ne’e, Xefe Estadu husu atu vendedores ambulante sira bele organiza an atu nune’e Governu bele presta servisu ho didi’ak hodi bele tau matan ba sira.

Liuhusi Xefe Estadu, komunidade sira mós husu ba Governu atu dezenvolve no promove “moradores” ne’ebé komunidade sira baibain uza hodi marxa, simu bainaka ka iha serimónia tradisionál no loron nasionál sira iha Timor-Leste.

“Ne’e kultura ida ne’ebé pasa hosi jerasaun ba jerasaun. Tanba ne’e, ita sei la halakon no ita sei promove, tanba ida-ne’e ita-nian rasik. Ita tenke hanoin planu no tau mós rekursu atu dezenvolve”, responde Xefe Estadu.

Maibé Xefe Estadu subliña liután katak, solusaun atu promove servisu “moradores” sira-nian depende ba Timoroan hotu, liuliu husi parte Governu. Maibé, Xefe Estadu mós esklarese katak, Governu sei halo buat hotu tuir prioridade hirak ne’ebé maka trasa tiha ona.

Hakarak informa atu mós katak, molok Xefe Estadu hato’o nia diskursu iha diálogu ho komunidade suku rua ne’e, Xefe Estadu mós fó oportunidade ba Diretora Komisaun Kombate moras HIV, Sra. Antonieta Magno de Araújo, hodi fahe informasaun, inklui halo apelu ba komunidade sira atu hatudu lala’ok hirak-ne’ebé sei hadook sira-nia an husi moras HIV. Tanba, moras HIV, moras ida-ne’ebé la iha ai-moruk atu kura.

Xefe Estadu mós aprezenta klarifikasaun sobre objetivu husi nia vizita ba suku 442, esplika prosesu dezenvolvimentu ne’ebé maka Governu Timor-Leste konsege hala’o no dezafiu hirak ne’ebé maka hasoru, inklui mós fó serbisu boot haat ne’ebé komunidade ka populasaun Timor-Leste presiza hala’o atu dezenvolve sira-nia moris no mós Timor-Leste.