DIÁLOGU XEFE ESTADU HO KOMUNIDADE SUKU FADABLOKU, HAUTOHO NO ASUMAU

by Media Team Posted on

Aileu, 25 Jullu 2016 – S.E. Prezidente Repúblika, Taur Matan Ruak, iha Segunda-feira dader, hala’o Diálogu Komunitária ho populasaun Suku Fadabloku, no Suku Hautoho, hafoin kontinua iha parte lokraik ho komunidade Suku Asumau, Postu Administrativu Remexio, Munisípiu Aileu.

Iha diálogu dahuluk, ho komunidade Fadabloku no Hautoho, populasaun sira hato’o ba Xefe Estadu sira-nia preokupasaun sobre Orsamentu Ratifikativu ne’ebé foin lalais ne’e Parlamentu Nasionál aprova no haruka ona ba Prezidente Repúblika.

Komunidade sira husu, tan sa mak orsamentu ne’ebé Parlamentu Nasionál aprova, so uza de’it atu selu dívidas Estadu nian no halo projetu sira ne’ebé la koresponde ho nesesidade sidadaun sira nian iha tempu badak.

Ba kestaun ne’e Xefe Estadu esplika: “Tusan ne’e saida? Tusan ne’e buat ne’ebe ita halo ou ema halo, mas ita la selu lalais. Ita iha uma karik deve ida ne’e, deve ida ne’eba, entaun tusan sa’e mate. Estadu mós hanesan.

 Tinan oin eleisoens ona. La hatene Governu ida ne’ebé mak mai. Nia (Governu atual) labele tau todan ba Governu foun ne’ebé mai. Ninia tusan ne’e nia tenki selu duni. Tusan balu iha ninia prosesu, tusan balu prosesu laiha. Governu mak tenki hatene.

 Klaru ke Prezidente Repúblika preokupa, tamba Governu halo tusan barak. Tusan sira ne’e ba emprezáriu sira, ne’ebé balu ki’ak tiha ona.

 Emprezáriu sira ba deve Banku, deve ema seluk nia osan, funan (jurus) iha. Estadu deve sira tinan rua, tolu, funan laiha. Ne’ebé ita problema boot”, afirma Xefe Estadu.

Aleinde ne’e, komunidade sira mós preokupa ba boatus sobre ezisténsia “ Grupu Ninja”, ne’ebé iha kalan na’ok labarik sira. Komunidade sira sente la seguru no husu Governu atu halo atuasaun lalais hodi hasoru grupu refere, karik eziste duni.

“Rekomendasaun ne’ebé ha’u bele fó ba ita-boot sira mak ne’e, ita boot sira tenki hamutuk ho OPS (Ofisiál Polísia Suku) sira, reforsa halo vijilánsia, kaer sira. Servisu ho PNTL, povu organiza-an, labele hatene tauk de’it”, responde Xefe Estadu.

Iha diálogu tuir mai, iha Suku Asumau, komunidade sira kontinua lamenta sobre asaun   Governantes sira nian. Tuir komunidade sira, frekuensia vizita ne’ebé membru governu sira halo ba area rurais menus liu kompara ho vizita ne’ebé sira halo ba rai-liur.

Komunidade sira realsa, tuir loloos membru Governu mak halo vizita barak liu ba suku, la’os Prezidente Repúblika.

Hatan ba preokupasaun ne’e Xefe Estadu hatete, Governu iha ona reprezentante liña ministerial iha munisípiu, ne’ebé bele serví no kanaliza informasaun husi baze ba Governu Sentrál.

Tan ne’e Xefe Estadu afirma komunidade sira bele servisu hamutuk ho autoridades suku to’o munisípiu, hodi fahe informasaun ba malu.

“Prezidente (Repúblika) mai ne’e, lori nasaun tomak nia naran. Se ami hotu mai, se mak hela implementa serbisu”, subliña Xefe Estadu.

Iha dialogu ho komunidade Suku Fadabloku, Suku Hautoho no Suku Asumau, komunidade sira kontinua hato’o sira nia preokupasaun sobre organizasaun “Movimentu Moris Foun (MMF)” ne’ebé hakarak hasa’e bandeira “Rin Besi Asu no Talin Korente”, iha Munisípiu Aileu.

Problema seluk mak komunidade suku tolu aprezenta ba Xefe Estadu mak hanesan, estrada laiha, pensaun veteranus la tuir partisipasaun funu, prestasaun serbisu ladi’ak iha Postu Saúde no iregularidade iha atribuisaun Bolsu Estudu husi Governu ba estudante sira.